Britaniyalik olimlar Antarktidani qoplab turgan muz qatlamidagi o‘zgarishlarni va tez o‘suvchi dengiz sathini tahlil qilib chiqdi, deb yozadi National Geographic. 84 nafar olim tomonidan o‘tkazilgan tadqiqot sun’iy yo‘ldoshlardan olingan ma’lumotlarga va Antarktidada o‘tkazilgan dala tadqiqotlari natijalariga asoslangan.
Aniqlanishicha, 2012-yilgacha Antarktida yiliga 76 milliard tonna tezlikda muz yo‘qotgan. Ammo so‘ng erish tezligi uch barobar oshib, yiliga 219 milliard tonna muzga yetgan — bu esa dengiz sathi bir yilda 0,6 millimetrga ko‘tarilishiga sabab bo‘lmoqda.
Jami olganda 1992-yildan buyon dengiz sathi 7,6 millimetrga ko‘tarilgan, shuning deyarli yarmi — 3 mm so‘nggi besh yilga to‘g‘ri keladi.
Sharqiy Antarktidada muz qatlamining hosil bo‘lishi hozircha faqat sekinlashgan bo‘lsa, Antarktida yarim oroli va G‘arbiy Antarktida shitob bilan muz yo‘qotmoqda. Xususan, 90-yillarda G‘arbiy Antarktidada muz erishi tezligi yiliga 53 milliard tonnani tashkil qilgan bo‘lsa, hozir — yiliga qariyb 159 milliard tonnaga yetgan.
Antarktidadagi muz zaxirasi Jahon okeani suvlari 58 metrga ko‘tarilishiga yetadi, bu esa ortga qaytarib bo‘lmas falokatga olib keladi.
Izoh (0)