Британиялик олимлар Антарктидани қоплаб турган муз қатламидаги ўзгаришларни ва тез ўсувчи денгиз сатҳини таҳлил қилиб чиқди, деб ёзади National Geographic. 84 нафар олим томонидан ўтказилган тадқиқот сунъий йўлдошлардан олинган маълумотларга ва Антарктидада ўтказилган дала тадқиқотлари натижаларига асосланган.
Аниқланишича, 2012 йилгача Антарктида йилига 76 миллиард тонна тезликда муз йўқотган. Аммо сўнг эриш тезлиги уч баробар ошиб, йилига 219 миллиард тонна музга етган — бу эса денгиз сатҳи бир йилда 0,6 миллиметрга кўтарилишига сабаб бўлмоқда.
Жами олганда 1992 йилдан буён денгиз сатҳи 7,6 миллиметрга кўтарилган, шунинг деярли ярми — 3 мм сўнгги беш йилга тўғри келади.
Шарқий Антарктидада муз қатламининг ҳосил бўлиши ҳозирча фақат секинлашган бўлса, Антарктида ярим ороли ва Ғарбий Антарктида шитоб билан муз йўқотмоқда. Хусусан, 90 йилларда Ғарбий Антарктидада муз эриши тезлиги йилига 53 миллиард тоннани ташкил қилган бўлса, ҳозир — йилига қарийб 159 миллиард тоннага етган.
Антарктидадаги муз захираси Жаҳон океани сувлари 58 метрга кўтарилишига етади, бу эса ортга қайтариб бўлмас фалокатга олиб келади.
Изоҳ (0)