Yadro qurolining qo‘llanilishi “yadro qishi” yoki “yadro kuzi”ni keltirib chiqarmasligi va insoniyatni yo‘q qilib yubormasligi uchun yadro quroliga ega bo‘lgan mamlakatlar 100 tadan ortiq jangovar kallakka ega bo‘lmasligi kerak. Bu haqda, Safety jurnaliga tayanib, “RIA Novosti” xabar berdi.
100 ta yadro kallagiga ega bo‘lgan mamlakatlar bir-birini tiyib turish potensialini yo‘qotmaydi, biroq bunda “yadro kuzi” kirib kelishining va o‘z fuqarolari ommaviy halokatining oldini olgan bo‘ladi. Ta’kidlanishicha, agar AQSh o‘zida mavjud bo‘lgan 1000 ta kallakdan foydalanganda va potensial dushman javob qaytarmaganda, terrorchilar tomonidan 2001-yil 11-sentabrda o‘ldirilganidan ko‘ra 50 marta ko‘p amerikalikni o‘ldirgan bo‘lardi.
Bugungi kunda dunyoda yadro quroliga ega to‘qqizta mamlakat bor. Ulardan beshtasi 1968-yildagi Yadro qurolini tarqatmaslik to‘g‘risidagi kelishuvni imzolagan “rasmiy” davlatlar bo‘lsa, to‘rttasi bunday qurolga ega ekanligini bevosita yoki bilvosita ma’lum qilgan “rejim buzg’unchilari” hisoblanadi. “Rasmiy” mamlakatlar qatoriga AQSh, Rossiya, Fransiya, Buyuk Britaniya va Xitoy kiradi. Ikkinchi guruhdan esa Hindiston, Pokiston va KXDR yuqoridagi kelishuvni “ochiqchasiga” buzuvchilar sifatida, Isroil esa o‘zining “yadroviy noshaffofligi” bilan kiradi.
Sovuq urush va mahalliy nizolar yillarida yuqoridagi barcha mamlakatlar yadro zaryadlarining ulkan zaxirasini to‘pladi — aviatsion bombalar va boshqa portlatuvchi qurilmalarga mo‘ljallangan taxminan 15 mingta yadroviy kallak mavjud. Olimlarning joriy hisob-kitobiga ko‘ra, bunday zaxiralar Yer yuzidagi butun hayotni bir necha o‘n marta yo‘q qilib yuborishga yetadi.
Izoh (0)