AQShning Nyu-York shahridagi Markaziy Osiyo Jamiyatining “Shashmaqom” ansambli mana necha yillardirki, amerikaliklarga Markaziy Osiyo xalqlarining milliy xalq kuy-qo‘shiqlarini namoyish etib keladi, deb hikoya qiladi “Xalq so‘zi”.
Yaqinda mazkur ansambl Vashingtonning Smitson muzeyi Frier va Sakler gallereyalarida o‘zbek musiqa san’atining o‘chmas mumtoz durdonasi Shoshmaqomdan yana bir bor namunalar ijro etib berdi. Guruh a’zolari - Shumiel Kuenov doira, David Davidov tanbur, Rafael Badalboyev akkardion chalib, o‘z san’atini namoyish etgan bo‘lsa, Rustam Samarqandiy o‘zining jozibali ovozi, Firuza Yagudayeva esa mohirona raqsi bilan amerikaliklarning havasini keltirdi.
Tadbirda “Jonon bo‘laman deb”, “Ajab-ajab”, “Samarqand ushshog‘i”, “Bahoram”, “Soqinomai Savti Kalon”, “To Bodi Sabo”, “Xanda-Xanda” kabi yana bir qator milliy xalq kuy va qo‘shiqlari yangradi.
“Shashmaqom tarkibidagi Buzruk, Rost, Navo, Dugoh, Segoh va Iroq maqomlarining har biri yirik shakldagi turkumli asarlar bo‘lib, 20 tadan 45 tagacha katta va kichik hajmdagi maqom yo‘lini o‘z ichiga oladi. O‘tmishda maqomlarning ijro etilishida tanbur va doira yetakchi sozlardan hisoblangan”, - deya yig‘ilganlarga qisqacha ma’lumotlar ham berib o‘tdi asli O‘zbekistondan bo‘lgan ijodkor Shumiel Kuenov.
Izoh (0)