АҚШнинг Нью-Йорк шаҳридаги Марказий Осиё Жамиятининг «Шашмақом» ансамбли мана неча йиллардирки, америкаликларга Марказий Осиё халқларининг миллий халқ куй-қўшиқларини намойиш этиб келади, деб ҳикоя қилади «Халқ сўзи».
Яқинда мазкур ансамбл Вашингтоннинг Смитсон музейи Фриэр ва Саклер галлереяларида ўзбек мусиқа санъатининг ўчмас мумтоз дурдонаси Шошмақомдан яна бир бор намуналар ижро этиб берди. Гуруҳ аъзолари - Шумиэл Куэнов доира, Давид Давидов танбур, Рафаэль Бадалбоев аккардион чалиб, ўз санъатини намойиш этган бўлса, Рустам Самарқандий ўзининг жозибали овози, Фируза Ягудаева эса моҳирона рақси билан америкаликларнинг ҳавасини келтирди.
Тадбирда «Жонон бўламан деб», «Ажаб-ажаб», «Самарқанд ушшоғи», «Баҳорам», «Соқиномаи Савти Калон», «То Боди Сабо», «Ханда-Ханда» каби яна бир қатор миллий халқ куй ва қўшиқлари янгради.
«Шашмақом таркибидаги Бузрук, Рост, Наво, Дугоҳ, Сегоҳ ва Ироқ мақомларининг ҳар бири йирик шаклдаги туркумли асарлар бўлиб, 20 тадан 45 тагача катта ва кичик ҳажмдаги мақом йўлини ўз ичига олади. Ўтмишда мақомларнинг ижро этилишида танбур ва доира етакчи созлардан ҳисобланган», - дея йиғилганларга қисқача маълумотлар ҳам бериб ўтди асли Ўзбекистондан бўлган ижодкор Шумиэл Куэнов.
Изоҳ (0)