Farg‘ona viloyati Qo‘shtepa tumani Do‘stlik va Do‘rmon mahalla fuqarolar yig‘inlarida ijtimoiy-ma’naviy muhitni o‘rganish bo‘yicha Respublika 3-ishchi guruhi tomonidan 942 xonadonga kirilib, 280 dan ortiq muammolar borligini aniqlandi.
2205 nafar aholi istiqomat qilayotgan Do‘stlik MFYda 158 nafar uzoq muddatga xorijga chiqib ketganlarning 115 nafari qaytgani aniqlandi. Do‘rmon MFYda esa bu raqamlar mos ravishda 208 nafar va 138 nafari tashkil etmoqda. Ammo chetdan qaytgan fuqarolarning bandligini ta’minlash talab darajasida emas.
Do‘stlik mahallasida 2 ta ko‘chaning jami 2,4 kilometrlik asfalt yo‘li joriy ta’mirlashga va 2 ta ko‘chaning 1,6 chaqirim yo‘li shag‘allashtirishga muhtoj. Do‘rmon mahallasida 4 ta ichki ko‘chaning jami 6,5 kilometrlik qismi shag‘allashtirish va asfalt qoplama qilinishini ko‘p zamonlardan buyon kutib yashamoqda.
Aholi soni muttasil o‘sib borayotgani, biroq ularni kerakli kuchlanishdagi elektr energiyasi bilan ta’minlashda oqsoqliklar kuzatilayotgani sababli Faxr ko‘chasiga yangi transformator punktini o‘rnatish lozim. Kumushbuloq va Qumqo‘rg‘on ko‘chalarida fuqarolar terak yog‘ochlaridan qo‘lbola simyog‘ochlar qo‘yib, simlar tortishgan. Ushbu simyog‘ochlar yong‘in xavfsizligi talablariga mutlaqo javob bermaydi. Har qanday beqaror shamol yoki yog‘ingarchilik kutilmagan holatlarga sabab bo‘lishi mumkin. Kumushbuloq ko‘chasiga 24 ta, Qumqo‘rg‘on ko‘chasiga 20 ta temir beton tayanchlar o‘rnatish va tarmoq tortish belgilandi.
Do‘rmon MFYdagi Ulug‘vor va Do‘rmon ko‘chalarida ham fuqarolar terak yog‘ochlaridan o‘zlariga moslab simyog‘ochlar o‘rnatishgan. Ulug‘vor ko‘chasida joylashgan aksariyat xonadonlarning elektr energiyasi tomlar osha o‘tgan. Bu ikki ko‘chaga 22 ta temir tayanchlar o‘rnatish zaruriyati aniqlandi.
Har ikki mahalla aholisini gaz ballonlari yetishmasligi doimiy ravishda qiynab kelmoqda. O‘rganishlardan keyin jami 200 ta gaz ballonlari ro‘yxat asosida zudlik bilan tarqatiladigan bo‘ldi.
Ichimlik suv muammosi ham og‘riqli muammo. Do‘stlik mahallasida joylashgan Faxr ko‘chasi 100 ta xonadon, Farog‘at ko‘chasi 37 ta xonadon, Kumushbuloq ko‘chasi 36 ta xonadon, Qumqo‘rg‘on ko‘chasi 120 ta xonadonda ichimlik suvi yo‘qligi uchun aholi bosma kran suvini iste’mol qilib keladi. 10-maktab hududida joylashgan ichimlik suvi minorasi ya’ni bashnya ta’mirtalab holatga kelgani uchun to‘liq quvvatda ishlamayapti. Mahallada 3,6 kilometrli ichimlik suvi tarmog‘i tortilsa, 300 nafarga yaqin xonadon ichimlik suvi bilan ta’minlanadi.
Do‘rmon mahallasida ham barcha ko‘chalarda suv tarmoqlari tortilganiga qaramay ular nosoz va yaroqsiz ahvolga kelib qolgan. Ikki yuzga yaqin oila mustaqil ravishda turli chuqurliklardan bosma kran orqali obi hayotdan foydalanib keladi. Do‘rmon ko‘chasida joylashgan suv minorasi 2015-yilda ta’mirlangan, lekin aholi shartnoma asosida belgilangan mablag‘ni to‘lamayotgani uchun nasos o‘chirib qo‘yilgan va buning oqibatida suv bosimi kamayib ketgan. 4 ta mahallaga 2400 metrlik tarmoqni ta’mirlash zaruriyati bor.
10-maktabning 2 ta binosi 1964-yilda, qolgan 3 ta binosi 1986-yilda qurilgan. Oradan 41 yil o‘tib, 2005-yili kapital ta’mirlangan.
840 o‘rinli bo‘lgan ushbu maktabda hozirgi kunda 1071 nafar bolalar ta’lim olmoqda. Maktab hududida qurilishi tugallanmagan 2 ta bino mavjud bo‘lib, 1991-yildan buyon qarovsiz, tashlandiq qolib ketgan. Natijada hech kimga kerak bo‘lmagan inshoat avariya holatiga tushib qolgan. Ushbu binoning yaroqliligini mutaxassislar yordamida o‘rganib chiqish va xulosaga olish bo‘yicha topshiriq berildi.
Maktab atrofidagi devorning ayrim qismlari ta’mirtalab ahvolda. Maktab hududi oz emas salkam 4 gektar maydonga ega. Bo‘sh turgan yerlar bilan birgalikda cho‘milish havzasiga ham mevali daraxt va poliz ekinlari ekib kelinmoqda. Ushbu dehqonchilik ishlaridan olingan daromaddan maktab ta’miri uchun sarf etish maqsadga muvofiq ekanligi tushuntirildi. Sport zalining kiyim almashtirish xonalari talabga javob bermaydi. Yoritish tizimi ishlamaydi. Yuvinish xonasi mavjud emas. Maktab kutubxonasida kitoblarni joylashtirish uchun kitob javonlari yetishmayapti. Maktab hojatxonasi devorlari sho‘rlashib, nurab yotibdi. Vaholanki, maktab 2020-yil Davlat dasturi asosida kapital ta’mirlanishi belgilangan.
Do‘rmon MFYdagi 7-sonli maktabgacha ta’lim muassasasi 1973-yilda qurilgan bo‘lib, 2015-yilda joriy ta’mirlangan. Bog‘cha 140 o‘ringa mo‘ljallangan. Biroq hozirda 175 ta bola tarbiyalanmoqda. Bog‘chada guruhlar uchun xonalar yetishmayapti. Bog‘chadagi isitish tizimi ishlamaydi. Yangi qozonxona va ko‘mirxona qurish kerak. Qish ham bir pastda kirib keladi. Hozirdan harakatni boshlamasa tarbiyachi va tarbiyalanuvchilar sovuq qishda qiyin avholda qoladi. Bino 2-qavatining sanuzellarini ta’mirlash, tashqaridagi hojatxonani butunlay qayta qurish kerak. Bog‘chaga qattiq va yumshoq jihozlar yetishmaydi. Bolalar o‘yingohi ham talab darajasida emas.
Muammolar ko‘lami shu bilan ham tugat qolmaydi. Do‘rmon MFY Do‘rmon ko‘chasida yashovchi fuqarolar zax suvlarning yer yuzasiga ko‘tarilishi natijasida imorat va dehqonchilik yerlari yaroqsiz holatga kelayotganidan shikoyat qilishmoqda. Ushbu muammoni hal etish uchun Do‘rmon ko‘chasi boshidagi zovurga qo‘shimcha ravishda ko‘chaning orqa qismidan, fermer xo‘jaligi yeri hisobidan qo‘shimcha zovur kovlash kerak. Ushbu ko‘cha yonidan Katta Farg‘ona kanali o‘tgani holda aholi dehqonchilik uchun suv yetishmayotganidan arz-u dod qilmoqda.
Ishchi guruhi muammolarni imkon qadar joyida hal qilmoqda. Yechilishi vaqt talab qiladigan masalalar esa “Yo‘l xaritalari”ga kiritilib, ijrosi qat’iy nazorat qilinayapti.
Izoh (0)