Фарғона вилояти Қўштепа тумани Дўстлик ва Дўрмон маҳалла фуқаролар йиғинларида ижтимоий-маънавий муҳитни ўрганиш бўйича Республика 3-ишчи гуруҳи томонидан 942 хонадонга кирилиб, 280 дан ортиқ муаммолар борлигини аниқланди.
2205 нафар аҳоли истиқомат қилаётган Дўстлик МФЙда 158 нафар узоқ муддатга хорижга чиқиб кетганларнинг 115 нафари қайтгани аниқланди. Дўрмон МФЙда эса бу рақамлар мос равишда 208 нафар ва 138 нафари ташкил этмоқда. Аммо четдан қайтган фуқароларнинг бандлигини таъминлаш талаб даражасида эмас.
Дўстлик маҳалласида 2 та кўчанинг жами 2,4 километрлик асфальт йўли жорий таъмирлашга ва 2 та кўчанинг 1,6 чақирим йўли шағаллаштиришга муҳтож. Дўрмон маҳалласида 4 та ички кўчанинг жами 6,5 километрлик қисми шағаллаштириш ва асфальт қоплама қилинишини кўп замонлардан буён кутиб яшамоқда.
Аҳоли сони муттасил ўсиб бораётгани, бироқ уларни керакли кучланишдаги электр энергияси билан таъминлашда оқсоқликлар кузатилаётгани сабабли Фахр кўчасига янги трансформатор пунктини ўрнатиш лозим. Кумушбулоқ ва Қумқўрғон кўчаларида фуқаролар терак ёғочларидан қўлбола симёғочлар қўйиб, симлар тортишган. Ушбу симёғочлар ёнғин хавфсизлиги талабларига мутлақо жавоб бермайди. Ҳар қандай беқарор шамол ёки ёғингарчилик кутилмаган ҳолатларга сабаб бўлиши мумкин. Кумушбулоқ кўчасига 24 та, Қумқўрғон кўчасига 20 та темир бетон таянчлар ўрнатиш ва тармоқ тортиш белгиланди.
Дўрмон МФЙдаги Улуғвор ва Дўрмон кўчаларида ҳам фуқаролар терак ёғочларидан ўзларига мослаб симёғочлар ўрнатишган. Улуғвор кўчасида жойлашган аксарият хонадонларнинг электр энергияси томлар оша ўтган. Бу икки кўчага 22 та темир таянчлар ўрнатиш зарурияти аниқланди.
Ҳар икки маҳалла аҳолисини газ баллонлари етишмаслиги доимий равишда қийнаб келмоқда. Ўрганишлардан кейин жами 200 та газ баллонлари рўйхат асосида зудлик билан тарқатиладиган бўлди.
Ичимлик сув муаммоси ҳам оғриқли муаммо. Дўстлик маҳалласида жойлашган Фахр кўчаси 100 та хонадон, Фароғат кўчаси 37 та хонадон, Кумушбулоқ кўчаси 36 та хонадон, Қумқўрғон кўчаси 120 та хонадонда ичимлик суви йўқлиги учун аҳоли босма кран сувини истеъмол қилиб келади. 10-мактаб ҳудудида жойлашган ичимлик суви минораси яъни башня таъмирталаб ҳолатга келгани учун тўлиқ қувватда ишламаяпти. Маҳаллада 3,6 километрли ичимлик суви тармоғи тортилса, 300 нафарга яқин хонадон ичимлик суви билан таъминланади.
Дўрмон маҳалласида ҳам барча кўчаларда сув тармоқлари тортилганига қарамай улар носоз ва яроқсиз аҳволга келиб қолган. Икки юзга яқин оила мустақил равишда турли чуқурликлардан босма кран орқали оби ҳаётдан фойдаланиб келади. Дўрмон кўчасида жойлашган сув минораси 2015 йилда таъмирланган, лекин аҳоли шартнома асосида белгиланган маблағни тўламаётгани учун насос ўчириб қўйилган ва бунинг оқибатида сув босими камайиб кетган. 4 та маҳаллага 2400 метрлик тармоқни таъмирлаш зарурияти бор.
10-мактабнинг 2 та биноси 1964 йилда, қолган 3 та биноси 1986 йилда қурилган. Орадан 41 йил ўтиб, 2005 йили капитал таъмирланган.
840 ўринли бўлган ушбу мактабда ҳозирги кунда 1071 нафар болалар таълим олмоқда. Мактаб ҳудудида қурилиши тугалланмаган 2 та бино мавжуд бўлиб, 1991 йилдан буён қаровсиз, ташландиқ қолиб кетган. Натижада ҳеч кимга керак бўлмаган иншоат авария ҳолатига тушиб қолган. Ушбу бинонинг яроқлилигини мутахассислар ёрдамида ўрганиб чиқиш ва хулосага олиш бўйича топшириқ берилди.
Мактаб атрофидаги деворнинг айрим қисмлари таъмирталаб аҳволда. Мактаб ҳудуди оз эмас салкам 4 гектар майдонга эга. Бўш турган ерлар билан биргаликда чўмилиш ҳавзасига ҳам мевали дарахт ва полиз экинлари экиб келинмоқда. Ушбу деҳқончилик ишларидан олинган даромаддан мактаб таъмири учун сарф этиш мақсадга мувофиқ эканлиги тушунтирилди. Спорт залининг кийим алмаштириш хоналари талабга жавоб бермайди. Ёритиш тизими ишламайди. Ювиниш хонаси мавжуд эмас. Мактаб кутубхонасида китобларни жойлаштириш учун китоб жавонлари етишмаяпти. Мактаб ҳожатхонаси деворлари шўрлашиб, нураб ётибди. Ваҳоланки, мактаб 2020 йил Давлат дастури асосида капитал таъмирланиши белгиланган.
Дўрмон МФЙдаги 7-сонли мактабгача таълим муассасаси 1973 йилда қурилган бўлиб, 2015 йилда жорий таъмирланган. Боғча 140 ўринга мўлжалланган. Бироқ ҳозирда 175 та бола тарбияланмоқда. Боғчада гуруҳлар учун хоналар етишмаяпти. Боғчадаги иситиш тизими ишламайди. Янги қозонхона ва кўмирхона қуриш керак. Қиш ҳам бир пастда кириб келади. Ҳозирдан ҳаракатни бошламаса тарбиячи ва тарбияланувчилар совуқ қишда қийин авҳолда қолади. Бино 2-қаватининг санузелларини таъмирлаш, ташқаридаги ҳожатхонани бутунлай қайта қуриш керак. Боғчага қаттиқ ва юмшоқ жиҳозлар етишмайди. Болалар ўйингоҳи ҳам талаб даражасида эмас.
Муаммолар кўлами шу билан ҳам тугат қолмайди. Дўрмон МФЙ Дўрмон кўчасида яшовчи фуқаролар зах сувларнинг ер юзасига кўтарилиши натижасида иморат ва деҳқончилик ерлари яроқсиз ҳолатга келаётганидан шикоят қилишмоқда. Ушбу муаммони ҳал этиш учун Дўрмон кўчаси бошидаги зовурга қўшимча равишда кўчанинг орқа қисмидан, фермер хўжалиги ери ҳисобидан қўшимча зовур ковлаш керак. Ушбу кўча ёнидан Катта Фарғона канали ўтгани ҳолда аҳоли деҳқончилик учун сув етишмаётганидан арз-у дод қилмоқда.
Ишчи гуруҳи муаммоларни имкон қадар жойида ҳал қилмоқда. Ечилиши вақт талаб қиладиган масалалар эса «Йўл хариталари»га киритилиб, ижроси қатъий назорат қилинаяпти.
Изоҳ (0)