Namangan tumanidagi sektorlarning ishchi guruhlari tomonidan shu yil 28-maydan 7-iyungacha mahallalarda o‘tkazgan muloqotlarda bandlik, yangi ish o‘rinlarini yaratish, oilaviy biznesni yo‘lga qo‘yish, tadbirkorlik faoliyatini boshlash, imtiyozli kreditlar asosida chorvachilik, parrandachilik, quyonchilik, asalarichilik, bog‘dorchilikni rivojlantirish, issiqxonalar tashkil etish kabi masalalar muhokamalar markazida bo‘ldi. Bu haqda “Daryo” muxbiri xabar berdi.
Ishchi guruhlarning 10 kun mobaynidagi faoliyati davomida 1071 ta muammo aniqlandi. Ularning deyarli 90 foizi ijobiy yechimini topdi. Jumladan, Urganji mahallasida yashovchi Fayzullo Jakbarovning ish bilan ta’minlash, Adhamjon Mamasoliyevning suyultirilgan gaz ballonini almashtirish, Sojidaxon Qo‘chqorovaning nabirasiga eshitish moslamasi olish, Dilbarxon Abdullayevaning davolanish uchun amaliy yordam, qorako‘llik Ibrohim Boltaboyevning farzandi ko‘zini operatsiya qildirish uchun order, Abdulhamid Xolmirzayevning namunali uy-joy so‘rab qilgan murojaatlari tuman bandlikka ko‘maklashish markazi, gazlashtirish idorasi, tibbiyot birlashmasi, “Mahalla” xayriya jamoat fondi kabi bir qator tashkilotlarning mutasaddilari tomonidan ijobiy hal qilindi.
Shuningdek, Abdulqodir Nasriddinovning Iftixor ko‘chasiga elektr simyog‘ochlarini o‘rnatish, Alijon Abdullayevning Porloq ko‘chasiga shag‘al yotqizish, elatanlik Mansur Qobulovning issiqxona qurish uchun kredit olish, Abdulla Ahmadjonovning xonadonini kadastr qildirish bo‘yicha murojaatlari ham ijobiy yechimini topdi.
Yuzma-yuz muloqotlar uyushmagan yoshlarni mehnatga jalb qilishda katta imkoniyatlar eshigini ochdi. Yil davomida faoliyati to‘xtatilgan bir qator tadbirkorlik subyektlarining faoliyati qayta tiklandi. Shu orqali qo‘shimcha yangi ish o‘rinlari yaratishga erishildi. Kam ta’minlangan va nochor oilalarga moddiy va ma’naviy yordam ko‘rsatildi.
Izoh (0)