Наманган туманидаги секторларнинг ишчи гуруҳлари томонидан шу йил 28 майдан 7 июнгача маҳаллаларда ўтказган мулоқотларда бандлик, янги иш ўринларини яратиш, оилавий бизнесни йўлга қўйиш, тадбиркорлик фаолиятини бошлаш, имтиёзли кредитлар асосида чорвачилик, паррандачилик, қуёнчилик, асаларичилик, боғдорчиликни ривожлантириш, иссиқхоналар ташкил этиш каби масалалар муҳокамалар марказида бўлди. Бу ҳақда «Дарё» мухбири хабар берди.
Ишчи гуруҳларнинг 10 кун мобайнидаги фаолияти давомида 1071 та муаммо аниқланди. Уларнинг деярли 90 фоизи ижобий ечимини топди. Жумладан, Урганжи маҳалласида яшовчи Файзулло Жакбаровнинг иш билан таъминлаш, Адҳамжон Мамасолиевнинг суюлтирилган газ баллонини алмаштириш, Сожидахон Қўчқорованинг набирасига эшитиш мосламаси олиш, Дилбархон Абдуллаеванинг даволаниш учун амалий ёрдам, қоракўллик Иброҳим Болтабоевнинг фарзанди кўзини операция қилдириш учун ордер, Абдулҳамид Холмирзаевнинг намунали уй-жой сўраб қилган мурожаатлари туман бандликка кўмаклашиш маркази, газлаштириш идораси, тиббиёт бирлашмаси, «Маҳалла» хайрия жамоат фонди каби бир қатор ташкилотларнинг мутасаддилари томонидан ижобий ҳал қилинди.
Шунингдек, Абдулқодир Насриддиновнинг Ифтихор кўчасига электр симёғочларини ўрнатиш, Алижон Абдуллаевнинг Порлоқ кўчасига шағал ётқизиш, элатанлик Мансур Қобуловнинг иссиқхона қуриш учун кредит олиш, Абдулла Аҳмаджоновнинг хонадонини кадастр қилдириш бўйича мурожаатлари ҳам ижобий ечимини топди.
Юзма-юз мулоқотлар уюшмаган ёшларни меҳнатга жалб қилишда катта имкониятлар эшигини очди. Йил давомида фаолияти тўхтатилган бир қатор тадбиркорлик субъектларининг фаолияти қайта тикланди. Шу орқали қўшимча янги иш ўринлари яратишга эришилди. Кам таъминланган ва ночор оилаларга моддий ва маънавий ёрдам кўрсатилди.
Изоҳ (0)