“Toshkent” xalqaro aeroporti orqali bojsiz olib kirish me’yorlari asosida tovarlarni olib o‘tib, ichki bozorlarga qayta sotish maqsadida tashiyotgan shaxslar faoliyatiga chek qo‘yish maqsadida bojxonachilar tomonidan huquqni muhofaza qiluvchi boshqa organlar bilan hamkorlikda doiimiy tezkor tadbirlar o‘tkazilmoqda. Bu haqda “Toshkent-Aero” IBK axborot xizmati ma’lum qildi.
Shunday tadbirlardan birida xorijdan uchib kelgan fuqaro X.Sh bojxona nazoratidan yo‘lovchilar ko‘magida olib o‘tilgan 6 dona iPhone uyali aloqa vositalarini aeroport avtoturargohida yig‘ib olib ketmoqchi bo‘lib turgan vaqtida tezkor tadbir ishtirokchilari tomonidan to‘xtatib qolindi. Dastlabki surishtiruvlarga ko‘ra, ushbu uyali telefonlarning umumiy qiymati 40 million so‘mni tashkil etadi.
Yana bir holatda esa “Sharja—Toshkent” yo‘nalishi bo‘yicha uchib kelgan fuqaro A.D. bojxonadan “yashil” yo‘lak orqali bamaylixotir o‘tar ekan, bojxona xodimining og‘zaki so‘rovi paytida ham yonida hech qanday ortiqcha mahsulotlar yo‘qligini ma’lum qilgan. Ammo uning bagaji nazorat tartibida bojxona ko‘rigidan o‘tkazilganda, ichida deklaratsiyalanishi lozim bo‘lgan, jismoniy shaxslar uchun belgilangan olib kirish me’yoridan ortiqcha, umumiy narxi dastlabki hisob-kitoblarga ko‘ra qariyb 113 million so‘mlik jami 16 dona iPhone X uyali aloqa vositalari borligi aniqlangan.
Hozirda ushbu holatlar yuzasidan bojxona tekshiruvlari davom ettirilmoqda.
Izoh (0)