«Тошкент» халқаро аэропорти орқали божсиз олиб кириш меъёрлари асосида товарларни олиб ўтиб, ички бозорларга қайта сотиш мақсадида ташиётган шахслар фаолиятига чек қўйиш мақсадида божхоначилар томонидан ҳуқуқни муҳофаза қилувчи бошқа органлар билан ҳамкорликда доиимий тезкор тадбирлар ўтказилмоқда. Бу ҳақда «Тошкент-Аэро» ИБК ахборот хизмати маълум қилди.
Шундай тадбирлардан бирида хориждан учиб келган фуқаро Х.Ш божхона назоратидан йўловчилар кўмагида олиб ўтилган 6 дона iPhone уяли алоқа воситаларини аэропорт автотураргоҳида йиғиб олиб кетмоқчи бўлиб турган вақтида тезкор тадбир иштирокчилари томонидан тўхтатиб қолинди. Дастлабки суриштирувларга кўра, ушбу уяли телефонларнинг умумий қиймати 40 миллион сўмни ташкил этади.
Яна бир ҳолатда эса «Шаржа—Тошкент» йўналиши бўйича учиб келган фуқаро А.Д. божхонадан «яшил» йўлак орқали бамайлихотир ўтар экан, божхона ходимининг оғзаки сўрови пайтида ҳам ёнида ҳеч қандай ортиқча маҳсулотлар йўқлигини маълум қилган. Аммо унинг багажи назорат тартибида божхона кўригидан ўтказилганда, ичида декларацияланиши лозим бўлган, жисмоний шахслар учун белгиланган олиб кириш меъёридан ортиқча, умумий нархи дастлабки ҳисоб-китобларга кўра қарийб 113 миллион сўмлик жами 16 дона iPhone X уяли алоқа воситалари борлиги аниқланган.
Ҳозирда ушбу ҳолатлар юзасидан божхона текширувлари давом эттирилмоқда.
Изоҳ (0)