NATO tomonidan kuchlarning operativ tayyorgarligi oshirilishi va yangi qo‘mondonliklarning tuzilishi bo‘yicha dasturning amalga oshirilishi alyansning kimdandir qo‘rqishini emas, balki o‘zgaruvchan vaziyatlarga moslashish zaruriyatini bildiradi. Bu haqda NATO bosh kotibi Yens Stoltenberg ma’lum qildi, deb yozmoqda “RIA Novosti”.
Stoltenbergning ma’lum qilishicha, NATO qo‘rqmaydi, biroq muvaffaqiyatli alyans bo‘lib qolish uchun yangi chaqiruvlarga moslashish, jahondagi o‘zgaruvchan vaziyatga javob bera oladigan bo‘lish kerak.
NATO bosh kotibi o‘zgaruvchan vaziyatlarga misol sifatida Rossiyaning “o‘zini ishonch bilan tutishini”, Yaqin Sharq va Shimoliy Afrikadagi beqarorlik va zo‘ravonlikni, alyans chegaralaridagi kiber tahdidlarni, shuningdek, ommaviy qirg‘in qurollari tarqalishi xavfini keltirib o‘tgan.
7-iyunda Bryusselda alyans mamlakatlari mudofaa vazirlarining yig‘ilishi bo‘lib o‘tadi. Unda alyans qo‘mondonlik tuzilmalarining ko‘paytirilishi masalalari hamda AQSh va Germaniyada ikkita yangi qo‘mondonlikning tuzilishi rejalari ko‘rib chiqiladi.
Shuningdek, operativ tayyorgarlikni oshirish rejasi ham ko‘rib chiqiladi. Rejaga ko‘ra, 2020-yilga qadar NATO mamlakatlari 30 kun davomida 30 ta mexanizatsiyalashtirilgan batalyon, 30 ta havo eskadriliyasi va 30 ta harbiy kemani tayyor holatda ushlab turishi kerak bo‘ladi.
Izoh (0)