Shavkat Mirziyoyev Toshkentni aylanishni boshladi. Birinchi bo‘lib yangi aeroport qurilishini borib ko‘rdi

O‘zbekiston Prezidenti Shavkat Mirziyoyev 1-iyun kuni Qibray tumanidagi aerodromda amalga oshirilayotgan ishlarni borib ko‘rdi. Bu haqda Prezident matbuot xizmati xabar bermoqda.

Prezidentning 2017-yil 30-iyundagi qarori asosida bu yerda 2018—2020-yillarda biznes aviatsiyasi uchun zamonaviy aeroport qurilishi belgilangan. Loyihani ikki bosqichda amalga oshirish — birinchi bosqichda 4 kilometrlik uchish-qo‘nish yo‘lagi va soatiga 250 yo‘lovchini o‘tkazish imkoniyatiga ega terminal barpo etish, ikkinchi bosqichda esa qo‘shimcha infratuzilma obyektlari, mehmonxona majmuasi qurish rejalashtirilgan.

Aeroportda eng katta yuk tashuvchi samolyotlarni qabul qilish va ularga xizmat ko‘rsatish uchun barcha sharoit yaratiladi. Hozirgi kunda bu yerda loyihalashtirish va umumiy qurilish ishlari boshlangan. Eski uchish-qo‘nish yo‘lagi butunlay olib tashlanmoqda.

Prezident Shavkat Mirziyoyev mazkur ishlarni ko‘zdan kechirdi. Aeroportda bunyod etiladigan obyektlar loyihalarini takomillashtirish bo‘yicha ko‘rsatmalar berdi.

Xorijiy delegatsiyalarni kutib olish binosi milliy madaniyatimizni, bag‘rikengligimizni ko‘rsatib tursin. Samolyotdan tushgan odamning kayfiyatini ko‘taradigan, mehmonlarga va ishbilarmonlarga har tomonlama ma’qul keladigan bo‘lsin.

Shavkat Mirziyoyev, O‘zbekiston Prezidenti