Fransiyaning Cluster Montagne kompaniyasi Chorvoq — Chimyon — Beldirsoy zonasida tog‘ turizmini rivojlantirish ishlarini kuchaytirmoqda. Bu haqda shu kunlarda Fransiyada bo‘lib turgan bir qator o‘zbek OAVlariga kompaniya mutaxassislari ma’lum qildi.
O‘zbekistondagi obyektlar bilan tanishuv 2013-yildayoq bo‘lgan, ammo faollik 2017-yildagina boshlangan. O‘zbekiston tomoni tog‘ turizmini rivojlantirish bo‘yicha texnik-iqtisodiy asos uchun aynan shu kompaniyaga murojaat qilgan.
Fransiyadagi Shamoni kurort zonasi taqdimotida kompaniya vakillari Chorvoq, Chimyon va Beldirsoy hududlarida turizm sanoatini modernizatsiya qilish bo‘yicha o‘z fikrlari haqida gapirib berdi. Ayni paytda investor korxonalar guruhi yaratilgan bo‘lib, Fransiya hukumati bilan g‘oyani qo‘llab-quvvatlash haqida muzokaralar olib borilmoqda.
Loyiha Chorvoq — Chimyon — Beldirsoy yagona tog‘ turizmi tizimini yaratishni, obyektlarning noyob tabiiy manzaralari maftunkorligini ilgari surishni, keng ko‘lamli qurilishda tartibsizliklarni istisno qilishni, piyoda sayr qilish yo‘nalishlarini yaratishni ko‘zda tutadi.
“Faqat ko‘ngilochar majmualarga urg‘u berish yetarli emas. Har bitta detali o‘zaro uyg‘unlashgan to‘la sifatli infratuzilma yaratish zarur. Bu ham sifatli yo‘llar, ham zamonaviy mehmonxonalar tarmog‘i demakdir, — dedi kompaniya menejerlari. — Biz ekomuvozanatni saqlash bo‘yicha mutaxassislarni tayyorlashda ham yordam berishga tayyormiz”.
Jurnalistlarga Shamoni kurort zonasi misolida qulay tog‘ turizmi zonasini qanday yaratishni ko‘rsatib berishdi.
Fransiya yalpi ichki mahsulotida turizm ulushi 10 foizga teng, ushbu soha jami ish o‘rinlarining 7 foizini beradi.
Alisher Azimov
Izoh (0)