Bekoboddagi peshonasiga “2” baho qo‘yilgan o‘quvchilar “o‘qituvchilar jangi” sabab jabrlangan (video)

Bekobod shahridagi 5-maktabning 1-“J” sinfida o‘qiydigan to‘rt nafar o‘quvchi uy vazifasiga berilgan she’rni yodlab kelmagani uchun, o‘qituvchi Muborak Hamdamova jazo tariqasida ularning peshonasiga “2” baho qo‘ygan. Muborak Hamdamova o‘quvchilarning peshonasiga ikki qo‘yganidan xabar topgan maktabning boshqa bir o‘qituvchisi — Saodat Rahmonova oradan ikki-uch kun o‘tib, o‘zi bolalarni yig‘ib, qaytadan ularning peshonasiga “2” baho qo‘ygan, ularni suratga tushirib, suratlarni internetga chiqarib yuborgan. Bu haqda “Yoshlar” telekanalining “Davr” informatsion dasturida ma’lum qilindi.

“Ma’lum bo‘lishicha, bu ikki o‘qituvchi o‘rtasida o‘zaro nizo bo‘lgan”, — deyiladi “Daryo” lavhasida.

Peshonamga ikki bahoni Saodat ustoz qo‘ydi. Hammamizni Damas’da olib kelib, keyin sinfxonamizga olib borib, bizni qo‘rqitdi: “Eshikni orqasida militsiya turibdi, bir yilga qamatvoradi”, deb. Keyin rasmga olib, shundan keyin salfetka berib, o‘chirvoringlar, dedi.

Jabrlanuvchi o‘quvchilardan birining “Davr”ga bergan intervyusidan

Sinf rahbari she’rni yodlamagani uchun, jazo sifatida o‘quvchilarning peshonasiga ikki qo‘ygani rost. O‘zi ham tan olgan, bolalar ham aytdi. Lekin oradan uch kun o‘tgach, Saodat ismli o‘qituvchi bu xabarni bilib qolib, bundan foydalanib, darsdan so‘ng uchala bolani “Sizlarni lavashga olib boraman” deb chaqirib olib, ikkini qo‘yib, rasmga tushirib, so‘ng o‘chirib, keyin lavashga olib borgan.

Hosiyat Omonova, Bekoboddagi 5-maktab psixologi

Biz uchun bu sharmandachilik. Biz ustozlarmiz. Biz uchun bu haqiqatan ham sharmandachilik. Men bunda o‘zimni ayblayman, maktab rahbari sifatida to‘rt o‘quvchining peshonasiga ikki baho qo‘ygan o‘qituvchini to‘xtatib qolish mening qo‘limdan kelmadi.

Dilfuza Bobomurodova, Bekoboddagi 5-maktabning sobiq direktori