Farg‘ona viloyati Yozyovon tumanida qaynonasining haqoratlari, erining kaltaklashiga chiday olmagan ayol o‘z joniga qasd qildi. Bu haqda “Daryo” muxbiri Azizjon Ermatov xabar bermoqda.
Voqea tafsilotiga ko‘ra, Rohila (ismlar shartli ravishda o‘zgartirilgan) qaynonasi tomonidan muntazam kamsitib kelingan. Rohila ikki farzandli bo‘lguncha bu zug‘umlarga chidab yashaydi. Ota uyiga borib, qaytib kelishlardan ham foyda chiqmaydi.
Qaynona-kelin o‘rtasidagi muntazam jaljallardan keyin Rohilaning turmush o‘rtog‘i Ismoil Jalilov ham ayolini tinimsiz kaltaklashni odat qildi. Kurakda turmaydigan haqoratlar, xo‘rliklar tabiiyki, Rohilaning ruhiyatiga, farzandlarining kamolotiga salbiy ta’sir ko‘rsatadi.
Surishtiruv va tergov ishlaridan ma’lum bo‘lishicha, Ismoil turmush o‘rtog‘ini ko‘p marotaba qasddan kamsituvchi so‘zlar bilan haqorat qilgan, unga tan jarohati yetkazgan. Qaynona esa uni tahqirlab, yengil tabiatlikda ayblagan, kelinidan ota-onasining uyiga ketishni talab qilgan. Mahalla faollari va Yozyovon tuman hokimligi vakillarining yarashtiruv borasidagi chora-tadbirlari ham oila mustahkamligini ta’minlay olmagan.
Oiladagi so‘nggi janjal fojea bilan tugaydi. Qaynona kelinini shaxsni kamsituvchi so‘zlar bilan haqoratlab o‘g‘lini unga qarshi harakatlanishga undadi. Ismoil yog‘och bilan Rohilani kaltaklab, badanining turli sohalariga ayovsiz uradi. Bu qiynoqlarga chiday olmagan Rohila Safarova shu kuni yashash xonadonidagi tol daraxtiga o‘zini osib, joniga qasd qiladi.
Sud tibbiy ekspertizaning xulosalari, tergov jarayonlaridagi dalillar va guvohlarning ko‘rsatmalari jinoyat tafsilotlarini yanada oydinlashtirdi. Sud hukmiga binoan Ismoil Jalilov 7 yil muddatga, Farog‘at Azimova 5 yil muddatga ozodlikdan mahrum qilindi.
Izoh (0)