Фарғона вилояти Ёзёвон туманида қайнонасининг ҳақоратлари, эрининг калтаклашига чидай олмаган аёл ўз жонига қасд қилди. Бу ҳақда «Дарё» мухбири Азизжон Эрматов хабар бермоқда.
Воқеа тафсилотига кўра, Роҳила (исмлар шартли равишда ўзгартирилган) қайнонаси томонидан мунтазам камситиб келинган. Роҳила икки фарзандли бўлгунча бу зуғумларга чидаб яшайди. Ота уйига бориб, қайтиб келишлардан ҳам фойда чиқмайди.
Қайнона-келин ўртасидаги мунтазам жалжаллардан кейин Роҳиланинг турмуш ўртоғи Исмоил Жалилов ҳам аёлини тинимсиз калтаклашни одат қилди. Куракда турмайдиган ҳақоратлар, хўрликлар табиийки, Роҳиланинг руҳиятига, фарзандларининг камолотига салбий таъсир кўрсатади.
Суриштирув ва тергов ишларидан маълум бўлишича, Исмоил турмуш ўртоғини кўп маротаба қасддан камситувчи сўзлар билан ҳақорат қилган, унга тан жароҳати етказган. Қайнона эса уни таҳқирлаб, енгил табиатликда айблаган, келинидан ота-онасининг уйига кетишни талаб қилган. Маҳалла фаоллари ва Ёзёвон туман ҳокимлиги вакилларининг яраштирув борасидаги чора-тадбирлари ҳам оила мустаҳкамлигини таъминлай олмаган.
Оиладаги сўнгги жанжал фожеа билан тугайди. Қайнона келинини шахсни камситувчи сўзлар билан ҳақоратлаб ўғлини унга қарши ҳаракатланишга ундади. Исмоил ёғоч билан Роҳилани калтаклаб, баданининг турли соҳаларига аёвсиз уради. Бу қийноқларга чидай олмаган Роҳила Сафарова шу куни яшаш хонадонидаги тол дарахтига ўзини осиб, жонига қасд қилади.
Суд тиббий экспертизанинг хулосалари, тергов жараёнларидаги далиллар ва гувоҳларнинг кўрсатмалари жиноят тафсилотларини янада ойдинлаштирди. Суд ҳукмига биноан Исмоил Жалилов 7 йил муддатга, Фароғат Азимова 5 йил муддатга озодликдан маҳрум қилинди.
Изоҳ (0)