“Bizning yakuniy maqsadimiz — barqaror bozor iqtisodiyoti va inson manfaatlarining ustuvorligini ta’minlovchi to‘laqonli demokratiya”, — deya ma’lum qildi O‘zbekistonning AQShdagi elchisi Javlon Vahobov. Bu haqda “Gazeta.uz” xabar berdi.
Shavkat Mirziyoyevning AQShga rasmiy tashrifi arafasida O‘zbekiston delegatsiyasi amerikalik jurnalistlar va ekspertlar bilan mamlakatda inson huquqlari va erkinliklariga bog‘liq vaziyatni muhokama qildi.
Javlon Vahobovning so‘zlariga ko‘ra, O‘zbekistonda hozirgi vaqtda barcha sohalarda, xususan, inson huquqlari, samarali boshqaruv va qonun ustuvorligi yo‘nalishlarida katta o‘zgarishlar amalga oshirilmoqda.
Elchi O‘zbekistonda inson huquqlari sohasida erishilgan yutuqlarni alohida qayd etdi. “Birinchidan, yaqinda O‘zbekiston parlamenti din erkinligini ta’minlash, din erkinligi to‘g‘risidagi qonun hujjatlarini qayta ko‘rib chiqish va diniy tashkilotlarni ro‘yxatga olishni soddalashtirish uchun ‘yo‘l xaritasini’ qabul qildi. ‘Iegova guvohlari’ va boshqa shu kabi kichik diniy tashkilotlarini ro‘yxatga olish sezilarli darajada soddalashtiriladi”, — deydi Javlon Vahobov.
“Inson huquqlari — bu katta va murakkab yo‘l, biz esa bu uzoq safarning boshida turibmiz. Menimcha, yaqin kelajakda respublika, 2006-yildan buyon jiddiy tashvish tug‘diradigan mamlakatlar (Country of Particular Concern) ro‘yxatidagi o‘z pozitsiyasini yaxshilaydi”, — deya qo‘shimcha qiladi elchi.
Shuningdek, elchi Shavkat Mirziyoyev hukumatga har qanday majburiy mehnatni favqulodda holat sifatida ko‘rib chiqishni topshirganini ta’kidladi.
Vashingtondagi Milliy press klubda bo‘lib o‘tgan tadbir bilan quyidagi havola orqali tanishish mumkin.
Izoh (0)