«Бизнинг якуний мақсадимиз — барқарор бозор иқтисодиёти ва инсон манфаатларининг устуворлигини таъминловчи тўлақонли демократия», — дея маълум қилди Ўзбекистоннинг АҚШдаги элчиси Жавлон Ваҳобов. Бу ҳақда «Газета.uz» хабар берди.
Шавкат Мирзиёевнинг АҚШга расмий ташрифи арафасида Ўзбекистон делегацияси америкалик журналистлар ва экспертлар билан мамлакатда инсон ҳуқуқлари ва эркинликларига боғлиқ вазиятни муҳокама қилди.
Жавлон Ваҳобовнинг сўзларига кўра, Ўзбекистонда ҳозирги вақтда барча соҳаларда, хусусан, инсон ҳуқуқлари, самарали бошқарув ва қонун устуворлиги йўналишларида катта ўзгаришлар амалга оширилмоқда.
Элчи Ўзбекистонда инсон ҳуқуқлари соҳасида эришилган ютуқларни алоҳида қайд этди. «Биринчидан, яқинда Ўзбекистон парламенти дин эркинлигини таъминлаш, дин эркинлиги тўғрисидаги қонун ҳужжатларини қайта кўриб чиқиш ва диний ташкилотларни рўйхатга олишни соддалаштириш учун ‘йўл харитасини’ қабул қилди. ‘Иeгова гувоҳлари’ ва бошқа шу каби кичик диний ташкилотларини рўйхатга олиш сезиларли даражада соддалаштирилади», — дейди Жавлон Ваҳобов.
«Инсон ҳуқуқлари — бу катта ва мураккаб йўл, биз эса бу узоқ сафарнинг бошида турибмиз. Менимча, яқин келажакда республика, 2006 йилдан буён жиддий ташвиш туғдирадиган мамлакатлар (Country of Particular Concern) рўйхатидаги ўз позициясини яхшилайди», — дея қўшимча қилади элчи.
Шунингдек, элчи Шавкат Мирзиёев ҳукуматга ҳар қандай мажбурий меҳнатни фавқулодда ҳолат сифатида кўриб чиқишни топширганини таъкидлади.
Вашингтондаги Миллий пресс клубда бўлиб ўтган тадбир билан қуйидаги ҳавола орқали танишиш мумкин.
Изоҳ (0)