Kattaqo‘rg‘on tumanida 23 yoshli o‘qituvchi Diana Yenikeyevaning o‘limi yuzasidan sud jarayoni nihoyasiga yetdi. Bu haqda, Oliy sud matbuot xizmatiga asoslanib, “Gazeta.uz” xabar bermoqda.
1-may kuni Kattaqo‘rg‘on tuman sudi hukmi bilan o‘qituvchini urib yuborgan yuk mashinasi haydovchisi Akrom Elmurodov JKning 266-moddasida ko‘zda tutilgan jinoyatni (yo‘l harakati xavfsizligi yoki transport vositalari ekspluatatsiyasi qoidalarini buzish) sodir etganlikda aybdor deb topilib, 6 yilga ozodlikdan mahrum qilindi, 3 yilga transport vositalarini boshqarish huquqidan mahrum qilindi.
Advokat va Akrom Elmurodov 4-may kuni apellyatsiya tartibida chiqarilgan hukm yuzasidan shikoyat qildi. U Samarqand viloyati sudi apellyatsion instansiyasida 22-may kuni ko‘rib chiqiladi.
10-may kuni jinoiy ishlar bo‘yicha Samarqand viloyat sudi Kattaqo‘rg‘on tumani hokimining yoshlar siyosati, ijtimoiy rivojlanish va ma’naviy-ma’rifiy ishlar bo‘yicha o‘rinbosari Musoxon Muzaffarov, shuningdek, tuman xalq ta’limi bo‘limi mudiri Alisher Jumanazarovga nisbatan hukm o‘qidi.
Ular JKning 206-moddasida ko‘zda tutilgan jinoyatni (hokimiyatni va lavozim vakolatini suiiste’mol qilish) sodir etganlikda aybdor deb topilib, ish haqining 20 foizini ushlab qolish sharti bilan 2 yillik axloq tuzatish ishlariga hukm etildi, shuningdek, 45-moddani (ma’lum huquqdan judo etish) qo‘llash bilan bir yilga rahbar lavozimlarni egallash huquqidan mahrum etildi.
Sud xulosasiga muvofiq, Musoxon Muzaffarov o‘z qonuniy vakolatlaridan chetga chiqqan holda 13−14-mart kunlari xalq ta’limi bo‘limi mudiri Alisher Jumanazarovga o‘qituvchilar va texnik ishchilarni 98 maktab va 12 kasb-hunar kolleji direktorlari orqali M-37 “Samarqand – Buxoro – Turkmanboshi” magistral trassasi bo‘ylab taqsimlashni topshirgan. O‘qituvchilar va texnik xodimlar ularning mehnat majburiyatlariga aloqador bo‘lmagan ishlarga jalb etilib, yo‘lni tozalashga, shuningdek, daraxtlarni oqlash va beton to‘siqlarni oqlashga majbur bo‘lgan.
Diana Yenikeyeva yo‘ldan o‘tayotganida Akrom Elmurodov boshqaruvidagi “Kamaz” yuk mashinasi tomonidan urib yuborilgan. Voqea 14-mart kuni soat 13:00 da M-37 yo‘lining 66-kilometrida ro‘y bergan. Haydovchida avtomobilni boshqarish huquqini beruvchi hujjatlar bo‘lmagan.
Sud ishi ma’lumotlariga ko‘ra, haydovchi Dianani beton to‘siqning chap tomonida ko‘rib, ehtiyot choralarini ko‘rmagan. U mashinani to‘xtatib, uni xavfsiz aylanib o‘tish imkoniyatiga ega bo‘lsa-da, haydovchi bu imkoniyatdan foydalanmagan va yosh o‘qituvchini urib yuborgan.
Sud, shuningdek, jabrlanuvchi tomonning Akrom Elmurodov tomonidan 19,8 va 25 million so‘m miqdorida moddiy va ma’naviy zarar qoplanishi yuzasidan iltimosnomasini qisman qondirdi.
Izoh (0)