Каттақўрғон туманида 23 ёшли ўқитувчи Диана Еникееванинг ўлими юзасидан суд жараёни ниҳоясига етди. Бу ҳақда, Олий суд матбуот хизматига асосланиб, «Газета.uz» хабар бермоқда.

Фото: «Xabar.uz»

1 май куни Каттақўрғон туман суди ҳукми билан ўқитувчини уриб юборган юк машинаси ҳайдовчиси Акром Элмуродов ЖКнинг 266-моддасида кўзда тутилган жиноятни (йўл ҳаракати хавфсизлиги ёки транспорт воситалари эксплуатацияси қоидаларини бузиш) содир этганликда айбдор деб топилиб, 6 йилга озодликдан маҳрум қилинди, 3 йилга транспорт воситаларини бошқариш ҳуқуқидан маҳрум қилинди.

Адвокат ва Акром Элмуродов 4 май куни апелляция тартибида чиқарилган ҳукм юзасидан шикоят қилди. У Самарқанд вилояти суди апелляцион инстанциясида 22 май куни кўриб чиқилади.

10 май куни жиноий ишлар бўйича Самарқанд вилоят суди Каттақўрғон тумани ҳокимининг ёшлар сиёсати, ижтимоий ривожланиш ва маънавий-маърифий ишлар бўйича ўринбосари Мусохон Музаффаров, шунингдек, туман халқ таълими бўлими мудири Алишер Жуманазаровга нисбатан ҳукм ўқиди.

Улар ЖКнинг 206-моддасида кўзда тутилган жиноятни (ҳокимиятни ва лавозим ваколатини суиистеъмол қилиш) содир этганликда айбдор деб топилиб, иш ҳақининг 20 фоизини ушлаб қолиш шарти билан 2 йиллик ахлоқ тузатиш ишларига ҳукм этилди, шунингдек, 45-моддани (маълум ҳуқуқдан жудо этиш) қўллаш билан бир йилга раҳбар лавозимларни эгаллаш ҳуқуқидан маҳрум этилди.

Суд хулосасига мувофиқ, Мусохон Музаффаров ўз қонуний ваколатларидан четга чиққан ҳолда 13−14 март кунлари халқ таълими бўлими мудири Алишер Жуманазаровга ўқитувчилар ва техник ишчиларни 98 мактаб ва 12 касб-ҳунар коллежи директорлари орқали М-37 «Самарқанд – Бухоро – Туркманбоши» магистраль трассаси бўйлаб тақсимлашни топширган. Ўқитувчилар ва техник ходимлар уларнинг меҳнат мажбуриятларига алоқадор бўлмаган ишларга жалб этилиб, йўлни тозалашга, шунингдек, дарахтларни оқлаш ва бетон тўсиқларни оқлашга мажбур бўлган.

Диана Еникеева йўлдан ўтаётганида Акром Элмуродов бошқарувидаги «Камаз» юк машинаси томонидан уриб юборилган. Воқеа 14 март куни соат 13:00 да М-37 йўлининг 66-километрида рўй берган. Ҳайдовчида автомобилни бошқариш ҳуқуқини берувчи ҳужжатлар бўлмаган.

Суд иши маълумотларига кўра, ҳайдовчи Дианани бетон тўсиқнинг чап томонида кўриб, эҳтиёт чораларини кўрмаган. У машинани тўхтатиб, уни хавфсиз айланиб ўтиш имкониятига эга бўлса-да, ҳайдовчи бу имкониятдан фойдаланмаган ва ёш ўқитувчини уриб юборган.

Суд, шунингдек, жабрланувчи томоннинг Акром Элмуродов томонидан 19,8 ва 25 миллион сўм миқдорида моддий ва маънавий зарар қопланиши юзасидан илтимосномасини қисман қондирди.