“Mening fikrim” portalida turli muhr va shtamplar bosilgan xorij valyutalarini bank komissiyasisiz qabul qilish bo‘yicha petitsiya ro‘yxatdan o‘tkazildi, deb xabar beradi Sputnik.
Petitsiya muallifining ta’kidlashicha, ko‘plab xorijliklar, xususan, Osiyo davlatlaridan bo‘lgan sayyohlar valyuta ayirboshlash shoxobchalarida nima sababdan stepler bilan teshilgan, muhr va shtamp tushirilgan valyutalar qabul qilinmayotganidan hayratda.
“Ular Tashqi iqtisodiy faoliyat milliy bankiga keyinchalik 5 foizdan 20 foizgacha komissiya summalarini olib qolgan holda almashtirish uchun yuboriladi. Bizning bank tizimimiz Pokiston, Hindiston, Xitoy, Afg‘oniston, Malayziya, Indoneziya va boshqa mamlakatlarda ushbu shtamp va muhrlar kupyuraning haqiqiyligini bildirishini anglashi kerak. Ushbu mamlakatlardan bo‘lgan deyarli barcha turistlar bu kabi noqulaylikka duch kelmoqda”, — deydi petitsiya muallifi.
“Aslini olganda vaziyat undanda yomon. O‘zbekiston aholisi ko‘p yillardan buyon valyutani faqatgina ‘qora bozor’dan xarid qilib kelgan. Albatta, bunday vaziyatda ko‘pchilik kupyuralarning saqlanishiga e’tibor bermagan, dollarning aksariyati teng ikkiga buklangan holda yillab saqlangan. Shu bilan birga u vaqtda tanlov bo‘lmagan, nimani taklif qilishsa, o‘shani sotib olishga majbur bo‘lishgan”, — deyiladi xabarda.
Valyuta bozorining liberallashuvidan keyin ko‘plab o‘zbekistonliklar o‘z dollarlari “yomon saqlangani” uchun banklarga topshira olmay aziyat chekmoqda. Ayni vaqtda ushbu vaziyatning yagona chorasi — eski kupyura uchun bank komissiyasini to‘lash.
Qiziq jihati, banklararo amalga oshirilgan pul o‘tkazmalarida fuqarolarga eski kupyuralarning ham topshirilishi kuzatilgan.
Izoh (0)