2018-yil 8-mayda “O‘zbekiston Respublikasida afv etishni amalga oshirish tartibi to‘g‘risida nizomni tasdiqlash haqida”gi Prezident Farmoni imzolandi. Bu haqda Adliya vazirligining “Huquqiy axborot” kanali xabar beradi.
Shu munosabat bilan, 2009-yil 13-martda qabul qilingan “O‘zbekiston Respublikasida afv etishni amalga oshirish tartibi to‘g‘risida”gi Nizom o‘z kuchini yo‘qotdi.
Xo‘sh, yangi tahrirda qabul qilingan Nizom bilan eskisining qanday farqi bor?
Birinchidan, afv etish haqida iltimosnomani kiritish huquqiga ega bo‘lgan subyektlar ro‘yxati birmuncha aniqlashtirildi. Eski Nizomda “Afv etish haqidagi iltimosnoma, qoida tariqasida, sudlangan shaxs tomonidan yozma shaklda O‘zbekiston Respublikasi Prezidenti nomiga beriladi” deb belgilangan edi. Yangi Nizomda esa, ushbu iltimosnoma sudlangan yoki jazoni o‘tab chiqqan shaxs, shuningdek, qonun tomonidan iltimosnoma kiritish huquqiga ega bo‘lgan boshqa shaxs (organ) tomonidan kiritilishi mumkin ekanligi keltirilgan. Shuningdek, iltimosnoma boshqa shaxs (organ) tomonidan berilganda afv etilishi so‘ralayotgan shaxsning yozma roziligi bo‘lishi kerak.
Ikkinchidan, O‘zbekiston Respublikasi Prezidenti huzuridagi afv etish masalalari bo‘yicha Komissiyaning tarkibiga kimlar kirishi aniq ko‘rsatib berildi. Yangi Nizomga asosan, ushbu Komissiyaning tarkibi O‘zbekiston Respublikasi Oliy sudi, Bosh prokuraturasi, Davlat xavfsizlik xizmati, Ichki ishlar vazirligi, Adliya vazirligi, shuningdek, Yoshlar ittifoqi va Xotin-qizlar qo‘mitasi, fuqarolarning o‘zini-o‘zi boshqarish organlari faoliyatini muvofiqlashitirish Respublika kengashi ham “Nuroniy” jamg‘armasi vakillaridan iborat bo‘ladi.
Shuningdek, Komissiya tarkibiga Oliy Majlis Qonunchilik Palatasi deputatlari va Senat a’zolari, boshqa davlat va nodavlat-notijorat tashkilotlarning vakillari hamda boshqa shaxslar ham jalb qilinishi mumkin.
Uchinchidan, afv etish haqidagi iltimosnomaga ilova qilinadigan hujjatlar soni ortdi. Jumladan, iltimosnomani dastlabki tarzda ko‘rib chiquvchi Prezident huzuridagi afv etish masalalari bo‘yicha Komissiya Sektoriga iltimosnoma bilan birga yuboriladigan hujjatlar ro‘yxatiga jazoni ijro etuvchi muassasaning ma’muriyati tomonidan tasdiqlangan mahkumning shaxsini tasdiqlovchi hujjat nusxasi qo‘shildi.
Eslatib o‘tamiz, Nizomga muvofiq afv etish Prezident tomonidan quyidagi shakllarda amalga oshiriladi:
• asosiy va o‘talmagan qo‘shimcha jazodan to‘liq yoki qisman ozod etish;
• jazodan shartli ozod qilish;
• umrbod ozodlikdan mahrum qilish jazosini yoki o‘talmay qolgan ozodlikdan mahrum qilish jazosi qismini yengilroq jazoga almashtirish;
• sudlanganlikni olib tashlash.
Izoh (0)