O‘zA Milliy axborot agentligi 1941-yil urushga chaqirtirilib, 1948-yil vataniga qaytgan bo‘lsa-da, urush qatnashchilari ro‘yxatidan tushirilib qoldirilgan qibraylik Qahhor ota haqida maqola e’lon qildi. Uni to‘lig‘icha keltirib o‘tamiz.
Qibray tumanining Yangiobod qishlog‘ida yashovchi urush qatnashchisi Qahhor ota Sattorovning xonadonida 9-may arafasida qo‘shaloq bayram bo‘ldi. Birinchidan, janggohlarda jon berib, jon olishgan bir jangchining pok nomi tiklanishi uchun qariyb qirq yil vaqt zarur bo‘ldi. Qahhor ota shuncha yil davomida bu yorug‘ kunning kelishini orzu qilib yashadi. Faqatgina O‘zbekiston Respublikasi Prezidentining Virtual qabulxonasiga xat yozganidan so‘nggina adolat qaror topdi.
Voqea tafsilotiga o‘tishdan burun otaning umr daftariga bir ko‘z yugurtirsak.
Q.Sattorrov yurtga fashist gazandalari bostirib kelganida endigina 21 yoshda edi. 1941-yilda Toshkent shahar Oktyabr tumani harbiy komissiriati tomonidan u harbiy xizmatga chaqirildi. O‘zbek yigiti to‘rt yil mobaynida 89,467,1107-o‘qchi polklarning tarkibida jang-u jadal kechdi, bir necha bor o‘lim bilan yuzma-yuz keldi.
Insoniyat tarixidagi eng katta talafot keltirgan va qurbonlar bo‘lgan, 1418 kun davom etgan qonli urush ham tugadi. Q.Sattorov bu muhorabadan sog‘-omon chiqdi. Qirq yil qirg‘in-barot bo‘lsa ham ajali yetmagan o‘lmaydi, deganlari shu bo‘lsa kerak-da. Biroq, unga hali-veri yurt diydorini ko‘rish nasib etmadi. Qahhor Ozarbayjon poytaxti Boku shahridagi xalq xo‘jaligi inshootlarini tiklash ishiga safarbar qilindi. U uyidan chiqib ketganiga yetti yil o‘tgachgina ota-onasi, ukalari bag‘riga qaytdi.
Qahhor ota tinchlik davrida ham fidokorlik namunasini ko‘rsatib mehnat qildi. Uzoq yillar Toshkent parrandachilik fabrikasida samarali ter to‘kdi va shu yerdan nafaqaga chiqdi. 1979-yilda Q.Sattorovga A №380666 raqamli urush qatnashchisi degan vaqtinchalik guvohnoma beriladi. So‘ng nimagadir urush faxriylari ro‘yxatidan tushib qoladi. Albatta, bu sho‘rolar davrida avj olgan qog‘ozbozlik, sansolarlik, loqaydlik kabi illatlarning kasri edi. Qirq yil badalida hech kim urushning boshidan oxirigacha qon kechgan jangchiga u nega ro‘yxatdan tushib qolganini tushuntirib berolmadi. Prezidentning Virtual qabulxonasiga qilingan murojaatdan keyingina ahvol o‘zgardi. Ushbu murojaat asosida Rossiya federatsiyasi mudofaa vazirligining Podolsk shahrida joylashgan markaziy arxiviga so‘rovnoma yuborildi. Bu yilgi Xotira va Qadrlash kuni bo‘sag‘asida arxivdan kelgan javob xati barcha masalaga oydinlik kiritdi. Xatga ilova qilingan arxiv ma’lumotnomasida, jumladan, shunday deyiladi:
“1922-yilda tug‘ilgan serjant Sattarov Qahhor 1941-yilda harbiy xizmatga chaqirilgan. 328-o‘qchi diviziyasining 1107-o‘qchi polki bo‘yicha 1943-yil 23-iyunda chiqarilgan buyrug‘ida quyidagi yozuv bor:
“2 ta dzot va 4 ta blindajni yakson qilganligi uchun 120-millimetrli minomyot to‘pchisi yefreytor Sattorov Qahhor Oliy Prezidium nomidan “Jangovar xizmatlari uchun” medali bilan taqdirlansin”.
328-o‘qchi diviziyaning 1107-o‘qchi polki 1942 yilning 30 avgustidan 1945 yilning 9 mayiga qadar harakatdagi armiya tarkibida bo‘lgan.
Arxiv hujjatlarini saqlash bo‘limi mudiri N.Moskach”.
Bugun Qahhor ota barcha urush qatnashchilari singari 9-mayni alohida g‘urur, zo‘r his-hayajon bilan kutib olmoqda.
Ikkinchi quvonchli voqea esa keksa jangchiga Prezidentimizning ko‘rsatmasiga asosan, elektr energiyasi, tabiiy gaz va ichimlik suvi iste’moli uchun 300 ming so‘mlik to‘lovlarni amalga oshirish imkonini beruvchi guvohnomaning topshirilishi bo‘ldi.
– Prezidentimizning Virtual qabulxonasi yordami bilan jangchi nomim qayta tiklanganligidan o‘zimni ikkinchi bor tug‘ilgandek his qilyapman, – deydi Qahhor ota Sattorov. – Bu hal bo‘lsa hech kim, hech narsa va hech qachon unutilmasligining bir isbotidir. Prezidentimizning “Ikkinchi jahon urushi qatnashchilarini rag‘batlantirish to‘g‘risida”gi Farmoniga binoan pul mukofoti hamda oltin soat sovg‘a qilinishi, MIB tomonidan kommunal to‘lovlarni to‘lash uchun guvohnoma berilishi esa kuchimga kuch, ruhimga ruh qo‘shdi. Shu dorilomon kunlarga eson-omon yetib kelganimizga shukronalar bo‘lsin!
Birgina Qibray tumani bo‘yicha bunday imkoniyatdan 13 kishi foydalanish imkoniyatiga ega bo‘ldi.
Izoh (0)