Isroilda Yaponiya bosh vazirini oyoq kiyim ichiga solingan shirinlik bilan haqorat qilishdi

Yaponiya bosh vazirining Isroilga tashrifi chog‘ida uni metall oyoq kiyim ichiga solingan shirinlik bilan mehmon qilishdi, deb yozadi The Jerusalem Post. Shokoladli desertni Isroil hukumati rahbari Binyamin Netanyaxuning shaxsiy oshpazi Moshe Segev tayyorlagan.

“Bu ahmoqona va beparvo tanlov. Yapon madaniyatida oyoq kiyimidan ham jirkanchroq narsa yo‘q. Ular nafaqat uyda, balki ishxonada ham poyabzalini yechib yuradi. Hatto bosh vazir, vazirlar, parlament a’zolari ham binolar ichida oyoq kiyim kiymaydi… Bu yahudiy mehmonlarga cho‘chqa shaklidagi idishda shokoladli konfetlar tortishday gap”, — dedi isroillik oliy mansabli diplomatlardan biri.

Uning fikriga Yaponiya diplomatik missiyasi vakili qo‘shildi. “Dunyoning hech qaysi madaniyatida oyoq kiyimi dasturxonga qo‘yilmaydi. Segev nimaga asoslangani tushunarsiz. Agar bu hazil bo‘lsa, biz uni kulgili deb hisoblamaymiz. Biz haqoratlangandek bo‘ldik”, — dedi u.