O‘zAda jurnalist G‘olib Hasanovning “Shudgorlangan yo‘l yoxud sabr qiling, haydovchilar” sarlavhali maqolasi chop etildi. Ushbu maqolada Samarqand viloyatidagi yirik bozorlardan biri Urgut bozori yaqinidagi yo‘lning ayanchli ahvoli tanqidga olinadi. Quyida maqola o‘z holicha e’tiboringizga havola etiladi.
Siz suratda ko‘rib turgan bu yo‘l – rasman 4R-47 “Bulung‘ur shahri – Urgut shahri-M-39” avtomobil yo‘li deb nomlanadi. Suratlar ushbu yo‘lning 60-80-kilometrida, ya’ni Urgut shahri va Kenagas qishlog‘i oralig‘ida olingan.
Lekin aholi, urgutliklar bu yo‘lni “tuxum fleykasi”, “dasturdan chetdan qolgan yo‘l”, “shudgorlangan yo‘l” deb nomlashadi. Buning boisini shu yo‘ldan bir bor o‘tgan yo‘lovchi yaxshi biladi. Ammo 20 kilometrlik bu yo‘l atrofidagi Mergancha, Kamangaron, Qing‘ir, Sariqtepa, Nisbat, Dehqonobod, Ravot, Kenagas kabi qishloqlarning minglab aholisi, istasa-istamasa, har kuni mana shu o‘ydim-chuqur yo‘ldan yurishga majbur. Bundan tashqari, “Jahon bozori” nomini olgan Urgut bozori ham shu yo‘l bo‘yida joylashgan. Bozorga har kuni yuzlab mashina o‘tib qaytadi.
Bir necha yildirki, Samarqandda respublika yo‘l xo‘jaligi mutasaddilari yoki turli vazirlik, qo‘mitalar mas’ullari va deputatlarning aholi bilan uchrashuvlari, muloqotlarida doim mazkur yo‘lning holati bo‘yicha murojaatlar bo‘ladi, masala ko‘tariladi. Lekin har safar javob bir xil – “dasturga kiritish bo‘yicha taklif beramiz” yoki “kelgusi yil dasturiga kiritiladi”.
Yaqinda biz ham aholining murojaatlari asosida yo‘lning holati to‘g‘risida maqola tayyorlash maqsadida Urgut tumani hokimi o‘rinbosariga murojaat qildik. Har tugul o‘rinbosar javobidan ko‘nglimiz to‘ldi – “Yo‘l joriy yilgi dasturga kirgan, ish boshlandi”. Bu gapdan so‘ng Urgutga safarimizni boshqa kunga qoldirdik va yo‘lning ta’mirlanish jarayonini yoritishni rejalashtirdik.
Oradan o‘n kunlar o‘tib, rejalashtirgan mavzuni yoritish uchun Urgut tomon yo‘l oldik.
M-39 yo‘lidan Urgut shahri tomon o‘sha ta’mirlanayotgan yo‘lga burildik. Ming afsus, yo‘lning holati suratda ko‘rib turganingizdek, hamon chang, transport vositalari qatnov qismi qolib, yo‘l chetidagi nisbatan tekis joydan harakatlanmoqda. Ko‘priklar o‘sha-o‘sha – ta’mirtalab, beton to‘siqlari tushib ketgan. “Ta’mirlanayotgan” yo‘lning biror joyida texnika ishlayotgani, tosh-shag‘al yoki qum to‘kayotganini ko‘rmadik. Faqat ushbu yo‘ldan Sariqtepa mahallasiga burilishda ichki yo‘lda yo‘l xo‘jaligi transport vositalari ishlayotganiga ko‘zimiz tushdi.
“Joriy yilda mazkur yo‘l dasturga kiritilib, ta’mirlash ishlarini olib borish uchun 44 milliard so‘m ajratilgan. Qurilish-ta’mirlash ishlarini amalga oshiradigan pudratchi aniqlangani yo‘q. Pudratchi bo‘lmaganidan keyin shartnoma ham, muddat ham aniq emas. Lekin biz dastlabki ishlarni bajaryapmiz. Yo‘lning 60—80-kilometrlari oralig‘ida 11 ming 700 kvadrat metr joyga shag‘al to‘shab, tekisladik. Dastur bo‘yicha ta’mirlash ishlari 2018—2019-yillarda to‘rt bosqichda – 5 kilometrdan bajariladi. Hozirda ilk loyiha-smeta hujjatlari tayyorlanib, ekspertizaga berilgan”, — deydi Urgut tumani yo‘llardan foydalanish unitar korxonasi boshlig‘i Eshmuhammad Abloyorov.
Korxona rahbarining aytishicha, mazkur tashkilotning 13 ta texnikasi bor va ular shu paytgacha imkon qadar ushbu yo‘lni tekislash ishlarini bajargan (bu texnika va imkoniyat bilan 20 kilometrlik yo‘lni zamon talablari darajasiga keltirishni tasavvur qilish qiyin). Ayni paytda esa korxona ishchi-xizmatchilari Sariqtepa mahallasidagi 1,8 kilometrlik ichki yo‘lni ta’mirlash bilan shug‘ullanmoqda.
Demak, hali 4R-47 “Bulung‘ur shahri – Urgut shahri-M-39” avtomobil yo‘li yoki “tuxum fleykasi”ning soz holatga kelishini ancha vaqt kutishga to‘g‘ri keladi. Chunki 2018-yilning to‘rtinchi oyi ham yakunlanmoqda, yo‘lning loyiha-smeta hujjatlari esa ekspertizada, ishni bajaradigan pudratchi aniqlanmagan. Shunday bo‘lgach, qanaqa xulosaga kelish mumkin. Sabr qiling, urgutlik haydovchilar, deymiz xolos.
Izoh (0)