“Barselona”ni YeChL yarim finalidan mosuvo qilgan “Roma” 5 yil deganda rasmiy homiyga ega bo‘ldi

Rimning “Roma” klubi Qatar Airways kompaniyasi bilan uch yillik shartnoma imzoladi. Bu haqda “Sports.ru” xabar berdi.

2017-yilga qadar “Barselona”ga homiylik qilgan qatarliklar endi Kataloniya klubini Yevropa Chempionlar Ligasidan chiqarib yuborgan “Roma” bilan birga hamkorlik qiladi.

“Roma” va Qatar Airways – tarixiy kelishuvga erishdi. Biz bu nomni futbolkalarimizga joylashtirishdan faxrlanamiz. Sport va tijorat sohasida muvaffaqiyat qozonish uchun birgalikda ishlashga tayyormiz.

Jeyms Pallotta, “Roma” prezidenti

Qatar Airways – klubning 90 yillik tarixidagi 7-rasmiy hamkoridir. Klubning so‘nggi hamkori Wind kompaniyasi edi. “Roma”ning mazkur kompaniya bilan shartnomasi 2013-yil yozida nihoyasiga yetgan. Klub shundan beri rasmiy homiy topmagan va futbolkalarda hech qanday homiylar nomisiz harakat qilib kelgan.