O‘zbekiston Yoshlar ittifoqi Aqto‘beda halok bo‘lgan namanganliklarning oila a’zolariga moddiy va ma’naviy yordam ko‘rsatdi. Bu haqda Ittifoq rahbari Qahramon Quronboyev Facebook’dagi sahifasida yozib qoldirdi.
Xabar berishlaricha, Xotira va qadrlash kuni munosabati bilan Namangan viloyatining To‘raqo‘rg‘on, Kosonsoy va Uchqo‘rg‘on tumanlarida Aqto‘be fojiasi oqibatida vafot etgan 17 kishi xotirasi yod etilgan.
“O‘zbekiston Yoshlar ittifoqi xodimlari fojia qurboni bo‘lgan 17 o‘g‘lonning ostonasiga birma-bir ko‘ngil so‘rab bordi. Jigarbandlaridan ayrilgan xonadon sohiblarini ham ma’naviy, ham moddiy jihatdan qo‘llab-quvvatlash maqsadida ularga 5 million so‘mdan mablag‘ taqdim etildi”, — deb yozadi Qahramon Quronboyev.
Qayd etishlaricha, “ko‘zida yosh bilan, qalbini ayriliq azobi tirnab turgan xonadon sohiblari ko‘rsatilgan g‘amxo‘rliklar uchun muhtaram Yurtboshimiz haqiga duo qildi”.
Eslatib o‘tamiz, 2018-yilning 18-yanvar kuni Qozog‘istonning Aqto‘be viloyatida O‘zbekiston fuqarolarini olib ketayotgan avtobus yonib ketgan, oqibatda 52 o‘zbekistonlik halok bo‘lgan edi.
Izoh (0)