Ўзбекистон Ёшлар иттифоқи Ақтўбеда ҳалок бўлган наманганликларнинг оила аъзоларига моддий ва маънавий ёрдам кўрсатди. Бу ҳақда Иттифоқ раҳбари Қаҳрамон Қуронбоев Facebook’даги саҳифасида ёзиб қолдирди.
Хабар беришларича, Хотира ва қадрлаш куни муносабати билан Наманган вилоятининг Тўрақўрғон, Косонсой ва Учқўрғон туманларида Ақтўбе фожиаси оқибатида вафот этган 17 киши хотираси ёд этилган.
«Ўзбекистон Ёшлар иттифоқи ходимлари фожиа қурбони бўлган 17 ўғлоннинг остонасига бирма-бир кўнгил сўраб борди. Жигарбандларидан айрилган хонадон соҳибларини ҳам маънавий, ҳам моддий жиҳатдан қўллаб-қувватлаш мақсадида уларга 5 миллион сўмдан маблағ тақдим этилди», — деб ёзади Қаҳрамон Қуронбоев.
Қайд этишларича, «кўзида ёш билан, қалбини айрилиқ азоби тирнаб турган хонадон соҳиблари кўрсатилган ғамхўрликлар учун муҳтарам Юртбошимиз ҳақига дуо қилди».
Эслатиб ўтамиз, 2018 йилнинг 18 январь куни Қозоғистоннинг Ақтўбе вилоятида Ўзбекистон фуқароларини олиб кетаётган автобус ёниб кетган, оқибатда 52 ўзбекистонлик ҳалок бўлган эди.
Изоҳ (0)