Namangan viloyatining To‘raqo‘rg‘on tumanida barpo etilayotgan issiqlik elektr stansiyasi ishga tushishini nafaqat namanganliklar, balki Farg‘ona vodiysi aholisi ham sabrsizlik bilan kutmoqda. Chunki, mazkur energetika inshooti mintaqada elektr ta’minotidagi muammolarga barham berish bilan birga, iqtisodiy va ijtimoiy rivojlanishga xizmat qiladi, deya xabar beradi O‘zA.
Keyingi paytda “To‘raqo‘rg‘on IESda nima gap? IES qurilishi to‘xtab qolgan shekilli? IES qachon ishga tushar ekan?” qabilidagi savollar ko‘paymoqda.
“O‘zdavenergonazorat” inspeksiyasi Namangan hududiy bo‘limi inspektori Sherzod Hojiyevga ko‘ra, mazkur muhim loyiha bo‘yicha bunyodkorlik ishlari izchil davom etmoqda. “O‘zbekenergo” DAK buyurtmasi asosida bunyod etilayotgan mazkur stansiyaning umumiy loyiha qiymati 1,2 milliard dollarga teng.
Hozirgacha bu yerda obyektgacha bo‘lgan yo‘l va kommunikatsiya tarmoqlari, direksiya ma’muriyati uchun ikki qavatli bino, yong‘in xavfsizligi xizmati inshootlari, soatiga 120 kub metr ishlab chiqarish quvvatiga ega bo‘lgan beton zavodi va boshqa ko‘plab yordamchi xo‘jalik inshootlari qurilgan. Bundan tashqari IESda ishlovchilar uchun qurilayotgan to‘rt qavatli ikkita turar-joy binosida pardozlash ishlari olib borilmoqda. Qurilish-montaj ishlariga 800 ishchi va 44 maxsus texnika jalb etilgan.
Xalqaro tenderda Yaponiyaning Mitsubihi Corporation va Mitsubishi Hitachi Power Systems konsorsumi bosh pudratchi sifatida g‘olib deb topildi. Ushbu kompaniya bilan 749,43 million dollarlik shartnoma imzolangan. 2017-yil 1-yanvaridan boshlab yordamchi pudratchi — Turkiyaning СaIik Enerji kompaniyasi muhandis-texnik mutaxassislari ham qurilish-montaj ishlarida ishtirok etmoqda.
Issiqlik elektr stansiyasining 1-energobloki 2019-yilning dekabr oyida ishga tushiriladi. 2-energoblok va stansiyaning to‘liq ishga tushirilishi 2020-yilning mart oyiga rejalashtirilgan.
Izoh (0)