Наманган вилоятининг Тўрақўрғон туманида барпо этилаётган иссиқлик электр станцияси ишга тушишини нафақат наманганликлар, балки Фарғона водийси аҳолиси ҳам сабрсизлик билан кутмоқда. Чунки, мазкур энергетика иншооти минтақада электр таъминотидаги муаммоларга барҳам бериш билан бирга, иқтисодий ва ижтимоий ривожланишга хизмат қилади, дея хабар беради ЎзА.
Кейинги пайтда «Тўрақўрғон ИЭСда нима гап? ИЭС қурилиши тўхтаб қолган шекилли? ИЭС қачон ишга тушар экан?» қабилидаги саволлар кўпаймоқда.
«Ўздавэнергоназорат» инспекцияси Наманган ҳудудий бўлими инспектори Шерзод Ҳожиевга кўра, мазкур муҳим лойиҳа бўйича бунёдкорлик ишлари изчил давом этмоқда. «Ўзбекэнерго» ДАК буюртмаси асосида бунёд этилаётган мазкур станциянинг умумий лойиҳа қиймати 1,2 миллиард долларга тенг.
Ҳозиргача бу ерда объектгача бўлган йўл ва коммуникация тармоқлари, дирексия маъмурияти учун икки қаватли бино, ёнғин хавфсизлиги хизмати иншоотлари, соатига 120 куб метр ишлаб чиқариш қувватига эга бўлган бетон заводи ва бошқа кўплаб ёрдамчи хўжалик иншоотлари қурилган. Бундан ташқари ИЭСда ишловчилар учун қурилаётган тўрт қаватли иккита турар-жой биносида пардозлаш ишлари олиб борилмоқда. Қурилиш-монтаж ишларига 800 ишчи ва 44 махсус техника жалб этилган.
Халқаро тендерда Япониянинг Mitsubihi Corporation ва Mitsubishi Hitachi Power Systems консорсуми бош пудратчи сифатида ғолиб деб топилди. Ушбу компания билан 749,43 миллион долларлик шартнома имзоланган. 2017 йил 1 январидан бошлаб ёрдамчи пудратчи — Туркиянинг СaIik Enerji компанияси муҳандис-техник мутахассислари ҳам қурилиш-монтаж ишларида иштирок этмоқда.
Иссиқлик электр станциясининг 1-энергоблоки 2019 йилнинг декабрь ойида ишга туширилади. 2-энергоблок ва станциянинг тўлиқ ишга туширилиши 2020 йилнинг март ойига режалаштирилган.
Изоҳ (0)