Bektemir kichik sanoat zonasida Prezident qarorlari ijrosi to‘liq ta’minlanmagan, ayrim tadbirkorlar imtiyozli kredit olish uchun oylab sarson bo‘lmoqda. Bu haqda O‘zA
xabar berdi.
Foto: O‘zATadbirkorlik hududining umumiy maydoni 5 gektar. Shundan 29 ming kvadrat metr maydonda ishlab chiqarish binolari joylashgan.
— 14 tadbirkorga ishlab chiqarish maydoni ajratilgan. Hozirgi kunda 5 tadbirkor o‘z faoliyatini boshlagan. Qolgan 9 tadbirkorimiz o‘ziga ajratilgan binoda ta’mirlash ishlarini tugatib, uskunalar xarid qilish, ularni olib kelib, o‘rnatish bilan mashg‘ul, — deydi “Bektemir kichik sanoat zonasini boshqarish direksiyasi” rahbari Mahammadjon Aliyev. — 8 tadbirkorning imtiyozli kredit olishga ehtiyoji bor. Bu haqda tegishli tashkilotlarga murojaat bilan chiqdik. Haligacha kredit ajratilgani yo‘q. Agar belgilangan tartibda imtiyozli kredit ajratilsa, ular uskunalar xarid qilish imkoniga ega bo‘ladi va ish faoliyatini tezroq boshlaydi.
Faoliyatini boshlagan 5 tadbirkorlik subyekti bugun qurilish materiallari, maishiy texnika, mebellar ishlab chiqarmoqda. Qolgan 9 tadbirkorda qanday muammo mavjud?
— Bizga ajratilgan binoda rekonstruksiya ishlarini tugatdik. Bu yerda jinsi matosidan tayyor kiyim-kechaklar tikib, asosiy qismini eksportga chiqarmoqchimiz. Buning uchun bizga bank krediti juda zarur bo‘lib turibdi, — deydi “Ark biznes invest” mas’uliyati cheklangan jamiyati rahbari Shuhrat Usmonov. — Shu masalada 2017-yilning noyabr oyidan buyon harakatdamiz. Direksiya orqali ham, o‘zimiz ham tegishli bankka, shahar hokimiyatiga murojaat bilan chiqdik.
Tadbirkor Sh. Usmanovning qiymati 1,4 million dollarlik loyihasi anchagina salmoqli va istiqbolli. Tadbirkor 1 yilda o‘rtacha 550 ming dona tayyor kiyim-kechak ishlab chiqarmoqchi. 95 yangi ish o‘rni yaratiladi. Loyihani 2018 yilning 2-choragida ishga tushirishni rejalashtirgan. Buning uchun o‘z sarmoyasi hisobidan ishlar boshlab yuborilgan. Xususan, Turkiya va Xitoydan zarur uskunalar xarid qilish uchun shartnomalar tuzilgan. Zamonaviy uskunalarning bir qismi yetib kelish arafasida. Ammo mazkur uskunalar uchun butlovchi qismlar, ishlab chiqarish quvvatini oshirish maqsadida yangi texnologiyalarni jalb etish zarur. Buning uchun tadbirkor 640 ming dollar qiymatida bankning imtiyozli kreditiga ehtiyoj sezmoqda.
Izoh (0)