O‘zbekistonda mahsulotlar eksporti uchun elektron savdo maydoni yaratiladi. Bu haqda 27-fevral kuni Prezident Shavkat Mirziyoyev raisligi ostida bo‘lib o‘tgan eksportni ko‘paytirish va importni qisqartirish bo‘yicha videoselektor yig‘ilishida ma’lum qilindi, deb yozadi Spot.
Davlat rahbari Janubiy Koreya bilan hamkorlikda 2019-yil 1-yanvardan boshlab, mahalliy eksportyor korxonalarning tovarlarini xorijiy xaridorlar tomonidan sotib olish imkoniyatini beradigan O‘zbekiston milliy savdo elektron maydonchasini ishga tushirish bo‘yicha topshiriq berdi.
Shuningdek, Prezident tovarlarni saqlash, eksportga tayyorlash va tashish bo‘yicha kompleks xizmatlarni ko‘rsatuvchi zamonaviy logistika markazlari tashkil etish bo‘yicha aniq “yo‘l xaritalari”ni tasdiqlash zarurligini qayd etdi.
Yig‘ilish tanqidiy ruhda o‘tdi. Unda joriy yilning o‘tgan davrida eksport bo‘yicha mo‘ljallangan rejalar bajarilmagani ta’kidlandi. Xususan, “O‘zagrotexsanoatxolding” aksiyadorlik jamiyati va “O‘zbekoziqovqatxolding” kompaniyasining bu boradagi sustkashligiga jiddiy e’tiroz bildirildi.
Davlat rahbari meva-sabzavot mahsulotlari eksportini ikki barobar oshirish haqida topshiriq berdi, qurilish materiallari va farmatsevtika tarmoqlarida import hajmi eksportdan o‘nlab barobar yuqoriligiga e’tibor qaratdi.
Izoh (0)