O‘zbekiston Markaziy bankida jismoniy va yuridik shaxslar murojaatlari bilan ishlash departamenti negizida Bank xizmatlari iste’molchilarining huquqlarini himoya qilish xizmati tashkil etildi. Bu haqda Markaziy bank matbuot xizmati ma’lum qildi.
Xizmatning asosiy vazifasi quyidagilar etib belgilandi:
Bank xizmatlari istemolchilarining huquq va qonuniy manfaatlarini himoyalash;
Moliyaviy xizmatlar qulayligini oshirish;
Aholi va tadbirkorlik subyektlarining moliyaviy savodxonlik darajasini oshirish bo‘lib hisoblanadi.
Xizmat tijorat banklari, mikrokredit tashkilotlari va lombardlar tomonidan qonun buzilishi holatlari bilan bog‘liq murojaatlarni ko‘rib chiqib, ularni bartaraf etish va iste’molchilar huquqlarini tiklash bo‘yicha ish olib boradi.
Bank xizmatlari iste’molchilarining huquqlarini himoya qilish tizimini takomillashtirish va kuchaytirish maqsadida jamoat qabulxonalarini tashkil etish rejalashtirilgan. Iste’molchilar mazkur qabulxonalarga bank xizmatlari sohasidagi amaldagi qonunchilik normalari yuzasidan maslahat va tushuntirishlar olish maqsadida murojaat etishi mumkin.
Iste’molchilar bank filiallari ofislariga hech qanday to‘siqsiz kirishi uchun ma’murlar bilan ta’minlangan mijozlarni dastlab qabul qiluvchi va axborot-maslahat beruvchi tizim va shart-sharoitlar yaratiladi.
Shuningdek, iste’molchilarning xizmatlar bo‘yicha haqqoniy va batafsil axborot olish huquqini ta’minlash maqsadida kredit muassasalari tomonidan mijozlarga kredit shartnomasi tuzilishidan oldin kredit (zayom)ning haqiqiy qiymatini bilish imkonini beradigan ma’lumotlar taqdim etish choralari ko‘riladi.
Joriy yil mart oyida Markaziy bankning internet-resursida xizmatning alohida bo‘limi ochiladi. Ushbu bo‘limda bank xizmatlari iste’molchilari uchun batafsil ma’lumotlar joylashtirib boriladi.
Izoh (0)