Ўзбекистон Марказий банкида жисмоний ва юридик шахслар мурожаатлари билан ишлаш департаменти негизида Банк хизматлари истеъмолчиларининг ҳуқуқларини ҳимоя қилиш хизмати ташкил этилди. Бу ҳақда Марказий банк матбуот хизмати маълум қилди.
Хизматнинг асосий вазифаси қуйидагилар этиб белгиланди:
Банк хизматлари истемолчиларининг ҳуқуқ ва қонуний манфаатларини ҳимоялаш;
Молиявий хизматлар қулайлигини ошириш;
Аҳоли ва тадбиркорлик субъектларининг молиявий саводхонлик даражасини ошириш бўлиб ҳисобланади.
Хизмат тижорат банклари, микрокредит ташкилотлари ва ломбардлар томонидан қонун бузилиши ҳолатлари билан боғлиқ мурожаатларни кўриб чиқиб, уларни бартараф этиш ва истеъмолчилар ҳуқуқларини тиклаш бўйича иш олиб боради.
Банк хизматлари истеъмолчиларининг ҳуқуқларини ҳимоя қилиш тизимини такомиллаштириш ва кучайтириш мақсадида жамоат қабулхоналарини ташкил этиш режалаштирилган. Истеъмолчилар мазкур қабулхоналарга банк хизматлари соҳасидаги амалдаги қонунчилик нормалари юзасидан маслаҳат ва тушунтиришлар олиш мақсадида мурожаат этиши мумкин.
Истеъмолчилар банк филиаллари офисларига ҳеч қандай тўсиқсиз кириши учун маъмурлар билан таъминланган мижозларни дастлаб қабул қилувчи ва ахборот-маслаҳат берувчи тизим ва шарт-шароитлар яратилади.
Шунингдек, истеъмолчиларнинг хизматлар бўйича ҳаққоний ва батафсил ахборот олиш ҳуқуқини таъминлаш мақсадида кредит муассасалари томонидан мижозларга кредит шартномаси тузилишидан олдин кредит (заём)нинг ҳақиқий қийматини билиш имконини берадиган маълумотлар тақдим этиш чоралари кўрилади.
Жорий йил март ойида Марказий банкнинг интернет-ресурсида хизматнинг алоҳида бўлими очилади. Ушбу бўлимда банк хизматлари истеъмолчилари учун батафсил маълумотлар жойлаштириб борилади.
Изоҳ (0)