Toshkent shahar hokimi Rahmonbek Usmonovning Prezident xalq qabulxonasi tomonidan tashkillashtirilgan ko‘chma qabuli o‘tkazildi, deb yozadi “Narodnoye slovo”.
Tadbirga ariza yozib shahar ma’muriyati rahbari bilan shaxsan uchrashishni so‘ragan 150 ga yaqin kishi taklif qilindi. Ammo yig‘ilgan odamlar soni 300 dan oshdi. Ko‘pchilik qarindoshlari, hamkasblari, qo‘shnilari bilan birga keldi, chunki ular ko‘targan muammolar aksariyat hollarda butun oila, ko‘p qavatli uylar, ko‘chalar, mahallalar taqdiriga aloqador.
“Veteran” O‘zbekiston faxriy jangchilari va nogironlari birlashmasi Toshkent shahar bo‘linmasi raisining o‘rinbosari Bekmurod Rahmatullayev Bektemir tumani “Majnuntol” mahallasidagi Cheksaroy ko‘chasining yoritilishi muammosini ko‘tardi. Dizayner-dekorator Vladislav Zamanov Yunusobod tumanidagi Amir Temur shoh ko‘chasida joylashgan 45-ko‘p xonadonli uyning buzilishi va buning evaziga to‘lanadigan tovon puli haqida ularga batafsil ma’lumot taqdim etilishini talab qildi.
Yashnobod tumani “Yangiqo‘rg‘on” mahalla fuqarolar yig‘inining jamoatchilik nazorati va iste’molchilar huquqlari himoyasi bo‘yicha komissiyasi raisi Ravshan Ergashev respublika hududida va chet elda odamlarni ishga joylashtirish imkoniyatlari bilan qiziqdi.
Ta’kidlanishicha, o‘tgan yili Prezidentning Toshkentdagi xalq qabulxonasiga 2,7 mingdan ortiq murojaat kelib tushgan, joriy yilning hozirgi davrigacha yana 2 mingta murojaat yuborilgan. Asosiy masalalardan biri — uy-joyga taalluqli.
Toshkent hokimi har bir fuqaroni tingladi, qabulda qatnashgan ma’muriyat, 60 dan ortiq davlat organlarining tuzilmaviy bo‘linmalari rahbarlariga tegishli topshiriqlar berdi.
Izoh (0)