Тошкент шаҳар ҳокимининг сайёр қабули ўтказилди

Тошкент шаҳар ҳокими Раҳмонбек Усмоновнинг Президент халқ қабулхонаси томонидан ташкиллаштирилган кўчма қабули ўтказилди, деб ёзади «Народное слово».

Тадбирга ариза ёзиб шаҳар маъмурияти раҳбари билан шахсан учрашишни сўраган 150 га яқин киши таклиф қилинди. Аммо йиғилган одамлар сони 300 дан ошди. Кўпчилик қариндошлари, ҳамкасблари, қўшнилари билан бирга келди, чунки улар кўтарган муаммолар аксарият ҳолларда бутун оила, кўп қаватли уйлар, кўчалар, маҳаллалар тақдирига алоқадор.

«Ветеран» Ўзбекистон фахрий жангчилари ва ногиронлари бирлашмаси Тошкент шаҳар бўлинмаси раисининг ўринбосари Бекмурод Раҳматуллаев Бектемир тумани «Мажнунтол» маҳалласидаги Чексарой кўчасининг ёритилиши муаммосини кўтарди. Дизайнер-декоратор Владислав Заманов Юнусобод туманидаги Амир Темур шоҳ кўчасида жойлашган 45-кўп хонадонли уйнинг бузилиши ва бунинг эвазига тўланадиган товон пули ҳақида уларга батафсил маълумот тақдим этилишини талаб қилди.

Яшнобод тумани «Янгиқўрғон» маҳалла фуқаролар йиғинининг жамоатчилик назорати ва истеъмолчилар ҳуқуқлари ҳимояси бўйича комиссияси раиси Равшан Эргашев республика ҳудудида ва чет элда одамларни ишга жойлаштириш имкониятлари билан қизиқди.

Таъкидланишича, ўтган йили Президентнинг Тошкентдаги халқ қабулхонасига 2,7 мингдан ортиқ мурожаат келиб тушган, жорий йилнинг ҳозирги давригача яна 2 мингта мурожаат юборилган. Асосий масалалардан бири — уй-жойга тааллуқли.

Тошкент ҳокими ҳар бир фуқарони тинглади, қабулда қатнашган маъмурият, 60 дан ортиқ давлат органларининг тузилмавий бўлинмалари раҳбарларига тегишли топшириқлар берди.