Qirg‘izistonning Jalolobod viloyati Qo‘chqor-Ota shahridagi qahvaxonada yuz bergan portlashda uch nafar o‘zbekistonlik jabrlandi, deya xabar bermoqda “Turmush.kg” viloyat ichki ishlar boshqarmasiga tayanib.
Qahvaxonada gaz pechi portlab ketgan. Dastlabki ma’lumotlarga ko‘ra, bunga qahvaxona ichidagi novvoyxonada gaz sizib chiqqani sababchi bo‘lgan. Ayni paytda voqea joyida tergov guruhi ishlamoqda. Portlash sabablarini aniqlashtirish maqsadida tegishli ekspertizalar belgilangan.
Hodisada to‘rt kishi — To‘qto‘g‘ul tumanining Torkent qishlog‘i fuqarosi hamda uch nafar namanganlik jabrlangan. Uchala o‘zbekistonlik ham ushbu qahvaxona novvoyxonasida ishlagan, ular ro‘yxatda turib, shahardagi uylardan birida vaqtinchalik yashagan.
Jabrlanganlarning ikki nafari og‘ir, yana ikki nafari esa o‘rtacha og‘ir ahvolda. Bir kishi O‘sh shahar kasalxonasiga ko‘chirilgan, qolgan uch kishi Qo‘chqor-Ota kasalxonasida davolanmoqda.
Izoh (0)