Prezidentning “Oliy ta’lim muassasalari pedagogika yo‘nalishida maxsus sirtqi bo‘limlarini tashkil etish to‘g‘risida”gi qarori aholi, ayniqsa, o‘rta maxsus ma’lumotli kadrlarning oliy ma’lumotli bo‘lishida muhim imkoniyat yaratdi. Bu haqda O‘zA xabar berdi.
Navoiy viloyati Nurota tumani Chuya qishlog‘ida yashovchi fuqaro F.T. Navoiy pedagogika kollejida tahsil olib, 2000-yildan 2015-yil noyabriga qadar qishloq maktablaridan birida dars beradi.2015-yil noyabrida esa u moliyaviy sharoitini yaxshilash maqsadida xorijga ishga ketib, maktab direktorining o‘sha yil 25-noyabrdagi buyrug‘i bilan ishdan bo‘shatiladi.
Oradan bir yil o‘tgach, u xorijdan qaytadi. Ayni o‘sha damlarda mamlakat rahbarining yuqorida nomi zikr etilgan qarori e’lon qilinadi va F.T. buni o‘zi uchun imkoniyat deb qabul qiladi. Ammo, qaror asosida maxsus sirtqi bo‘limga faqat ayni paytda pedagogik faoliyat bilan shug‘ullanayotgan shaxslargina qabul qilinishi belgilab qo‘yilgan edi.
F.T. maktab direktoriga murojaat qiladi. Ularning o‘zaro til biriktirishi natijasida muassasa rahbari tomonidan F.T. maktabda o‘qituvchi vazifasida ishlab kelayotgani to‘g‘risida qalbaki tavsiyanoma va xat tayyorlanib, Navoiy davlat pedagogika institutiga yuboriladi. Afsuski, mazkur holatga tuman xalq ta’limi bo‘limining pedagog kadrlar hujjatlarini qabul qilish va o‘rganish bo‘yicha maxsus komissiyasi ham e’tiborsizlik qiladi.
F.T. Navoiy davlat pedagogika institutining maxsus sirtqi bo‘limiga o‘qishga qabul qilinadi. Biroq, huquq-tartibot idoralari tomonidan olib borilgan o‘rganishlar natijasida mazkur qing‘irliklar fosh etilib, maktab direktoriga nisbatan Jinoyat kodeksining 209-moddasi 1-qismi va F.T.ga nisbatan shu kodeksning 28, 209-moddasi 1- qismi bilan jinoyat ishi qo‘zg‘atiladi.
Tergov jarayonida ularning jinoiy harakatlari rad etib bo‘lmaydigan dalil va ashyolar bilan o‘z isbotini topdi. Mazkur jinoyat ishi jinoyat ishlari bo‘yicha Nurota tumani sudining tuman xalq ta’limi bo‘limi binosida bo‘lib o‘tgan ochiq sayyor sud majlisida ko‘rib chiqildi.
Sud mazkur jinoyat ishi bo‘yicha hukm chiqarishda Jinoyat kodeksi 10-, 65-, 66-, 70-, 71-moddalari talablaridan kelib chiqib hamda sudlanuvchilarning aybiga to‘liq iqror bo‘lgani va qilmishidan chin dildan pushaymonligini, xalq ta’limi bo‘limining unga ishonch bildirib, kelgusida bunday holat takrorlanmasligi borasidagi bayonoti va “Chuya” mahalla fuqarolar yig‘ini raisining sayyor sud majlisida ularni kafillikka olish haqida taqdim etgan iltimosnomasini inobatga oldi.
Sud har ikkala sudlanuvchini ham jazodan ozod qildi.
Izoh (0)