Turkiya rasmiylari shahardan qishloqqa ko‘chib o‘tishga rozi bo‘lganlarga 300 ta qo‘y taklif qilmoqda

Turkiya qishloq xo‘jaligi vazirligi shahardan qishloqqa ko‘chib o‘tishga tayyor aholi uchun maxsus dastur ishlab chiqdi. Bu haqda “TASS” xabar bermoqda.

Ko‘chib o‘tishga rozi bo‘lgan oilalar uchun 300 ta qo‘y taklif etilmoqda.

Vazirlik aholining shaharga migratsiyasi ko‘lamini baholab va qishloq joylari umuman aholisiz qolishi xavfi tufayli shunday chora taklif qildi.

Yangi fermerlarning asosiy xaridori davlat bo‘ladi va qo‘ylarni qulay narxlarda sotib oladi. Davlatdan olingan 300 ta qo‘y uchun qarzni qo‘zichoqlar tariqasida qaytarish yoki kelgan tushumdan hisob-kitob qilish mumkin.

Shuningdek, qishloqqa ko‘chib kelganlarni qo‘llab-quvvatlash uchun ipoteka kreditlari, ijtimoiy va tibbiy sug‘urta ajratiladi, yem, dori-darmon bilan ta’minlanadi, zaruriyat tug‘ilganda veterinar xizmati ko‘rsatiladi.