“Zo‘r TV” telekanalida O‘zbekistonda yagona bo‘lgan “Boriga baraka” televizion kapital shousi boshlanadi. Ushbu shouda har bir O‘zbekiston fuqarosi ishtirok etishi va sayohat, avtomobil hamda kvartira kabi qimmatbaho sovrinlar sohibiga aylanishi mumkin.
Televizion o‘yin Sharq bozori tamoyillariga asoslangan. Ko‘rsatuvda asosiy boshlovchidan tashqari ikkita yordamchi boshlovchilar — dallollar ham bo‘lib, ularning vazifasi ishtirokchini yutuqli kataklar ochishini to‘xtatishga ko‘ndirishdan iborat. Ishtirokchi maishiy texnika buyumlaridan tortib, xonadongacha bo‘lgan sovrinlar yashiringan raqamli kataklarni ochadi. Ko‘rsatuv shunisi bilan qiziqarliki, har bir ishtirokchi nima bo‘lganda ham sovringa ega bo‘ladi: bu maishiy texnika, sayohat, avtomobil, kvartira yoki gugurt bo‘lishi mumkin. Bu shouda faqat omad yoki ichki hisga ishonish kerak.
Shouda ishtirok etishning ikkita yo‘li bor. Click mobil bank tizimidan foydalanib, USSD buyrug‘ini *880*06666*6*5000# (yuborish qiymati — 5000 so‘m) yuborish yoki Chilonzor, Yunusobod tumanlarida, shuningdek, Samarqand, Qarshi va Farg‘ona shaharlarida joylashgan “ATLAS” ko‘ngilochar-savdo markazida kuponni to‘ldirish zarur. Ro‘yxatdan o‘tgan barcha ishtirokchilarning raqamlari “Click” bazasiga tushadi va tasodifiy raqamlar generatori yordamida efirda uchta baxtli ishtirokchi tanlanadi.
Efirga chiqish vaqti — shanba kunlari soat 20:00
“Nahori nashta — O‘zbekiston” televizion ko‘rsatuvi doirasida “Boriga baraka” loyihasining boshlovchilari Muzaffarbek Mirzabekov va To‘xtamurod Azizov ko‘pchilikni qiziqtirayotgan savollarga javob berishdi.
— Muzaffar aka, “Boriga baraka” loyihasi haqida to‘liqroq ma’lumot bersangiz?
— Men bu — respublikamiz telekanallari tarixida hali bo‘lmagan o‘yin, deb ishonch bilan ayta olaman. Ushbu ko‘rsatuv tomoshabinlarimizning ko‘ngillarini ko‘tarish maqsadida namoyish etilmoqda. O‘yin ishtirokchilari xonadonlariga, quruq qo‘l bilan emas, albatta sovg‘a-salom bilan boradilar. Ko‘rsatuv anonsida aytilganidek, ikki xonali uy, mashina, maishiy texnikadan tortib lampochkagacha bo‘lgan sovg‘alarni qo‘lga kiritishlari mumkin.
— Demak, mashina, uy va turli xil qimmatli sovrinlarni haqiqatdan ham yutib olish mumkinmi?
— Albatta. Hech qanday tanish-bilishchilikka o‘rin yo‘q. Qatnashmoqchi bo‘lgan tomoshabinlar birinchi bo‘lib Click’ka o‘z raqamlarini yuboradilar. Undan keyin yangi qabul qilingan tizim o‘sha zahoti ko‘rsatuv ishtirokchilarini tanlab beradi. Bu efir vaqtida hammaning ko‘z oldida bo‘lib o‘tadi. Biz esa o‘sha zahoti unga qo‘ng‘iroq qilib, keyingi ko‘rsatuvga taklif qilamiz.
— Bu loyihada To‘xtamurod Azizov bilan Dilshod Mirzamurodovning vazifalari nimadan iborat?To‘xtamurod AZIZOV:
— Dilshod ikkalamiz — dalollarmiz. Bu haqqoniy o‘yin. Shunday bo‘lgandan keyin qatnashgan odam “qutlug‘ uydan quruq ketmasligi” kerak. Baxti bor odam sovrinlarning ichidan eng zo‘rini yutib olishi mumkin. Agar omadi kelmasa, uyiga gugurt yoki bir dona dazmol olib boradi. Har holda quruq ketmaydi. Biz Dilshod bilan sahnaga chiqib, ishtirokchini o‘ziga kerak bo‘lgan sovg‘aga ko‘ndirishga harakat qilamiz. Ko‘nsa ko‘ndi. Ko‘nmasa o‘zi biladi. Balki keyingi o‘yinlarda omadi chopar. Eng muhimi, hech qanday g‘irromlik yo‘q.
— Ishtirokchilar sovg‘alarni qanday tanlaydilar?Muzaffar MIRZABEKOV:
— Ishtirokchilar yigirma to‘rtta katakdan istaganlarini birma-bir ochib boradilar. Ochilgan katakdagi sovrinlar o‘yindan chiqib ketadi. Qatnashuvchi oxirida qolgan katakdagi sovg‘ani qo‘lga kiritadi. O‘yin davomida esa dalollarimiz ishtirokchini biror sovg‘a bilan ko‘ndirib loyihadan chiqarib yuborishga urinishadi. Misol uchun, To‘xtamurod aka sahnaga chiqib, ishtirokchiga “Men senga mashina beraman, o‘ynama” deydi. Ishtirokchi ikkilanadi. Agar mashinani tanlasa, ikki xonali uyni qo‘ldan chiqaradi. Bordi-yu, mashinadan voz kechib, o‘yinni davom ettirsa, yutuqqa guldon chiqib qolishi ham mumkin.
— Loyihaning efirdagi davomiyligi…
— Davomiyligini bir soatlarga mo‘ljallayapmiz. Vaqt — oliy hakam. Imkon qadar ishtirokchilar ko‘p qatnashishini istayapmiz.
— Ko‘rsatuv g‘oyasi kimga tegishli?
— Bu loyihaning muallifi — Aziz Umurzoqov. Bizga birinchi marta aytganida o‘ylab ko‘rib, keyin ishlashga rozi bo‘ldik. Aziz har bir boshlovchining o‘z xarakteri bo‘lishiga urg‘u berdi. Misol uchun To‘xtamurod aka og‘ir-vazmin dallol, Dilshod esa qiziqqon, ishtirokchini shoshirib qo‘yadi. Hammaning o‘z obrazi bor.
To‘xtamurod AZIZOV:
— Menga ishtirokchilar ishonsa baxtidan, ishonmasa, o‘zi biladi.
— Qatnashishni istaganlarga yana bir bor to‘liq ma’lumot bersangiz? Qayerga murojaat qilishlari kerak?
— Shouda ishtirok etishning ikkita yo‘li bor. Click mobil bank tizimidan foydalanib, USSD buyrug‘ini *880*06666*6*5000# (yuborish qiymati — 5000 so‘m) yuborish yoki Chilonzor, Yunusobod tumanlarida, shuningdek, Samarqand, Qarshi va Farg‘ona shaharlarida joylashgan “ATLAS” ko‘ngilochar-savdo markazida kuponni to‘ldirish zarur. Ro‘yxatdan o‘tgan barcha ishtirokchilarning raqamlari Click bazasiga tushadi va tasodifiy raqamlar generatori qatnashuvchilarni tomoshabinlarimizning ko‘z oldida aniqlab beradi. Studiyaning o‘zida unga qo‘ng‘iroq qilib, keyingi ishtirokchi u bo‘lishi aytiladi. O‘zi bilan jonli suhbat olib boriladi. Hammasi ochiq-oydin.
Reklama huquqi asosida!
Izoh (0)