Xalq ta’limi vazirligi tomonidan 9—10-sinf o‘quvchilari o‘rtasida o‘tkazilgan “My Motivation to Study” (“O‘qishga bo‘lgan ishtiyoqim”) ingliz tilidagi insholar tanloviga kelib tushgan ijodiy ishlar kontent tahlili orqali o‘quvchilar eng ko‘p murojaat qilgan so‘z va so‘z birikmalarini aniqlandi.
Tanlovning birinchi bosqichida respublikaning barcha hududlaridan qabul qilingan jami 3200 dan ortiq insholar “NVIVO 11” dasturi yordamida o‘rganildi va ularda “I will”, “I can”, “Study”, “Future” kabi so‘zlardan eng ko‘p foydalanilgani ma’lum bo‘ldi.
Kelib tushgan insholar g‘oyasiga e’tibor qaratadigan bo‘lsak, O‘zbekiston maktablarida tahsil olayotgan ingliz tili bilimdonlari insholarida kelajakni o‘z qo‘llari bilan qurish va o‘zi yashayotgan jamiyatni rivojlantirib, undagi takomillashtirilishi kerak bo‘lgan sohalarda ijobiy yangilanishlar qilish haqida gap borganini ko‘rish mumkin.Mazkur tanlov vazirlik tomonidan O‘zbekiston ingliz tili o‘qituvchilari uyushmasi va YuNESKOning O‘zbekistondagi vakolatxonasi bilan hamkorlikda tashkil etildi.Ko‘plab insholar mamlakatda hozirgi kunda yaratilgan sharoitlardan imkon qadar samarali foydalanish va o‘z kuchi bilan muvaffaqiyatga erishish orzu-niyatlarini o‘zida aks ettirgan. Qolaversa, o‘quvchi-yoshlarimiz vatanparvarligini, yurtiga bo‘lgan muhabbati va fidoyiligini boshqa tillarda ham bemalol ifodalay olishining guvohi bo‘ldik.
Sheroz Narzullayev, O‘zbekiston Xalq ta’limi vazirligi o‘quvchi-yoshlar bilan ishlash bo‘limi mutaxassisi
Ikki bosqich (hududiy va respublika)da tashkil qilinayotgan ko‘rik-tanlovga topshirilgan ishlar ekspertlar tomonidan mazmun bayoni ravonligi, saviyasi va dalillar keltirilganligi hamda ta’sirliligi bo‘yicha baholanib, ular ichidan 42 tasi respublika bosqichiga tanlab olindi.
Insholar tanlovining mutlaq g‘oliblari joriy yilning 8-9 fevral kunlari Toshkent shahrida bo‘lib o‘tadigan respublika bosqichida aniqlanadi.
Izoh (0)