Халқ таълими вазирлиги томонидан 9—10-синф ўқувчилари ўртасида ўтказилган «My Motivation to Study» («Ўқишга бўлган иштиёқим») инглиз тилидаги иншолар танловига келиб тушган ижодий ишлар контент таҳлили орқали ўқувчилар энг кўп мурожаат қилган сўз ва сўз бирикмаларини аниқланди.
Танловнинг биринчи босқичида республиканинг барча ҳудудларидан қабул қилинган жами 3200 дан ортиқ иншолар «NVIVO 11» дастури ёрдамида ўрганилди ва уларда «I will», «I can», «Study», «Future» каби сўзлардан энг кўп фойдаланилгани маълум бўлди.
Келиб тушган иншолар ғоясига эътибор қаратадиган бўлсак, Ўзбекистон мактабларида таҳсил олаётган инглиз тили билимдонлари иншоларида келажакни ўз қўллари билан қуриш ва ўзи яшаётган жамиятни ривожлантириб, ундаги такомиллаштирилиши керак бўлган соҳаларда ижобий янгиланишлар қилиш ҳақида гап борганини кўриш мумкин.Мазкур танлов вазирлик томонидан Ўзбекистон инглиз тили ўқитувчилари уюшмаси ва ЮНЕСКОнинг Ўзбекистондаги ваколатхонаси билан ҳамкорликда ташкил этилди.Кўплаб иншолар мамлакатда ҳозирги кунда яратилган шароитлардан имкон қадар самарали фойдаланиш ва ўз кучи билан муваффақиятга эришиш орзу-ниятларини ўзида акс эттирган. Қолаверса, ўқувчи-ёшларимиз ватанпарварлигини, юртига бўлган муҳаббати ва фидойилигини бошқа тилларда ҳам бемалол ифодалай олишининг гувоҳи бўлдик.
Шероз Нарзуллаев, Ўзбекистон Халқ таълими вазирлиги ўқувчи-ёшлар билан ишлаш бўлими мутахассиси
Икки босқич (ҳудудий ва республика)да ташкил қилинаётган кўрик-танловга топширилган ишлар экспертлар томонидан мазмун баёни равонлиги, савияси ва далиллар келтирилганлиги ҳамда таъсирлилиги бўйича баҳоланиб, улар ичидан 42 таси республика босқичига танлаб олинди.
Иншолар танловининг мутлақ ғолиблари жорий йилнинг 8-9 февраль кунлари Тошкент шаҳрида бўлиб ўтадиган республика босқичида аниқланади.
Изоҳ (0)