Farg‘ona viloyatida Alisher Navoiy tavalludining 577 yilligi munosabati bilan qator tadbirlar o‘tkazilmoqda. Bu haqda jurnalist Muhammadjon Obidov xabar bermoqda.
9-fevral kuni Farg‘ona shahri markazidagi shoir nomi bilan ataluvchi ko‘cha va maydondagi haykal poyida yuzlab farg‘onaliklar to‘plandi.
Viloyat hokimi Shuhrat G‘aniyev buyuk mutafakkir ijodini o‘rganish va targ‘ib qilish borasidagi qilingan va rejadagi maqsadlar haqida gapirdi.
“Navoiy asarlaridagi ezgu g‘oyalar umumbashariy va o‘lmasdir. Bugungi avlod unga munosib yashashga burchli”, — dedi Shuhrat G‘aniyev.
Tadbirda olimlar tomonidan Navoiy ijodini o‘rganish jarayonidagi yangi tadqiqot natijalari haqida ma’lumot berdi. Shoirlar hamda “Zulfiya” nomidagi davlat mukofoti sovrindorlari o‘zbek, rus, ingliz, fransuz tillarida g‘azallar o‘qidi.
Bundan tashqari, Islom Karimov nomidagi san’at saroyida nazm va navo kechasi bo‘lib o‘tdi. Unda yaqindagina viloyatda tashkil etilgan maqom guruhi san’atkorlari Navoiy g‘azallariga bitilgan qo‘shiqlarni ijro etdi.
Navoiy ijodi targ‘ibotchi va tadqiqotchilari, “Navoiyni bilish” tanlovi g‘oliblari viloyat hokimligining sovg‘alari bilan taqdirlandi.
Izoh (0)