“O‘zbekiston pochtasi” AJ va Shveysariyaning Zoodel kompaniyasi o‘rtasida o‘zaro anglashuv memorandumi imzolandi. Bu haqida “Xalq so‘zi” xabar bermoqda.
Memorandumga muvofiq, tomonlar tajriba va ma’lumot almashishadi, o‘zaro konsultativ qo‘llab-quvvatlashni amalga oshiradi, elektron tijorat rivojlanishiga bag‘ishlangan tadbirlarda qatnashishni ta’minlaydi.
2018-yilning birinchi yarmida O‘zbekistonda ZoodMall elektron onlayn maydonchasi ishga tushiriladi. Bu orqali ishlab chiqarish kompaniyalari va dilerlar o‘z mollarini vositachilarsiz sotish imkoniyatiga ega bo‘ladi.
Ishlab chiqaruvchi va sotuvchilarga tovarlarni mobil ilovalar yordamida ZoodMall saytiga joylashtirish, ZoodMall’ga joylashtirilgan tovarlarni eBay, AliExpress, Lazada, Cdiscount va boshqa xalqaro savdo maydonchalari orqali ilgari surish imkoniyati yaratiladi.
Bu esa kuniga yuz millionlab xaridorlarni O‘zbekistonda ishlab chiqarilgan tovarlar haqida xabardor bo‘lishiga imkoniyat yaratadi. Mamlakat tadbirkorlari mazkur dasturdan bepul ro‘yxatdan o‘tishi nazarda tutilayapti.
“ZoodMall mobil ilovasi o‘zbek ishbilarmonlariga xorij bozorlarida onlayn savdoni tashkil etishda qulay imkoniyatlar beradi. Bu 300 milliondan ortiq xaridor degani. O‘zbekiston iste’molchilariga esa eng yaxshi narxlar va takliflar taqdim etiladi. O‘z navbatida, milliy pochta operatori mahsulotlarni sifatli yetkazib berishni o‘z zimmasiga oladi”, — deydi Zoodel kompaniyasining MDH davlatlari bo‘yicha bosh direktori S. Muhammadaliyev.
Izoh (0)