Xakerlik hujumida ayblanayotgan rossiyalik Pyotr Levashovni uning iCloud akkaunti yordamida topishga muvaffaq bo‘lingan va 2016-yilning 20-mayidan boshlab kuzatilgan. Bu Apple’ning tergovchilar tomonidan yuborilgan rasmiy so‘rovdan keyingi yordami tufayli amalga oshgan. Bu haqda TJournal xabar berdi.
Pyotr Levashov “Severa” taxallusi ostida Kelihos botnet-tarmog‘i yaratganlikda ayblanmoqda. Ayblovga ko‘ra, Pyotr spamer va jinoyatchilarga zararlangan kompyuterlar tarmog‘iga kirish kalitlarini sotgan.
Anonimlikni ta’minlovchi kuchli choralarga qaramasdan, tergovchilar serverlardagi yozuvlar yordamida Levashovni aniqlashga muvaffaq bo‘lgan. Aniqlanishicha, Kelihos bilan bog‘liq ikkita server Lyuksemburgda joylashgan va ulardan tez-tez Levashovning pochtasiga kirilgan.
Tergovchilar Lyuksemburgdagi serverlarga tegishli IP-manzildan Levashov nomiga ro‘yxatdan o‘tkazilgan iCloud akkauntni aniqlagan. Bu ma’lumotlar bilan ular Apple’ga murojaat qilgan hamda akkaunt va IP-manzil haqida ma’lumot olish uchun rasmiy so‘rov yuborgan.
Apple barcha ma’lumotlarni taqdim etgan. Shundan so‘ng Levashovning Rossiyadan chiqishi kutilgan va 2017-yilning aprel oyida Barselonada qo‘lga olinib, AQShga ekstraditsiya qilingan. U sudda o‘zini aybsiz deb e’lon qilgan.
Izoh (0)