Muvaffaqiyatsiz operatsiyadan so‘ng amerikalik qizcha o‘lik deb topildi. Uning oilasi to‘rt yildan buyon qizning tirik ekanligini isbotlashga urinmoqda

Amerikalik oila farzandini o‘lik deb topgan shifokorlar bilan to‘rt yildan buyon sudlashib kelmoqda, deb yozadi Meduza. Jaxi Makmat ismli qizning qarindoshlari u hali tirik ekanligiga ishonchi komil. “Miya o‘lgan” degan tashxisga qaramay, qizcha hamon onasining ovoziga reaksiya ko‘rsatadi.

2013-yilning dekabrida 13 yoshli Makmatning adenoidini olib tashlashgan. Operatsiyani kunduzi o‘tkazishgan, tunga kelib esa qizchaning yuragi ishlamay qolgan. Uni hayotga qaytarishgan, ammo miya tashqi qo‘zg‘atuvchilarga reaksiya ko‘rsatmay qolgan. Ikki kundan keyin Oklenddagi kasalxona shifokorlari, mahalliy qonunlarga muvofiq, Makmatni o‘lik deb e’tirof etgan.

Biroq ota-onasi uni hayotni ta’minlash qurilmasidan o‘chirib qo‘yishni taqiqlagan. Ular qizi hali tirik ekanligiga ishongan. Ishga qonun himoyachilari aralashgan, ular bemorni boshqa shtatga olib o‘tishga yordam bergan. U yerda qizni sun’iy ravishda hayotni ta’minlash qurilmasiga ulab qo‘yishgan, u hamon o‘sha qurilmaga ulanib turibdi.

Ota-onasining so‘zlariga ko‘ra, qiz ba’zan tana qismlarini harakatlantirish bilan birga (buni “Lazar effekti” bilan izohlash mumkin), murakkabroq harakatlarni ham amalga oshiradi. Masalan, aynan onasi aytgan barmog‘ini qimirlatadi.

Olimlar turlicha fikrlar bildirmoqda. Ko‘pchilik qiz haqiqatan ham tirik ekanligini isbotlash uchun videoyozuvning o‘zi kifoya emas, deb hisoblaydi. 2015-yildan buyon Makmatning ota-onasi kasalxona bilan sudlashib, yuridik jihatdan qizining hayotini qaytarib berishni talab qilib kelmoqda.