Suriyalik isyonchilar 3-fevral kuni Rossiyaning Su-25 samolyotini urib tushirdi. Bu haqda, Syrian Observatory for Human Rights tashkilotiga asoslanib, BBC News xabar bermoqda.
Meduza’ning yozishicha, samolyot uchuvchisi katapulta qilishga ulgurgan. Conflict Intelligence Team tadqiqot guruhi isyonchilarning axborot manbalariga asoslanib xabar berishicha, uchuvchi halok bo‘lgan.
Rossiya Mudofaa vazirligi Suriyada Rossiyaning Su-25 samolyoti urib tushirilgani va hodisa oqibatida uchuvchi halok bo‘lganini tasdiqladi. Bu haqda “Interfaks” xabar bermoqda.
“Jaysh an-Nasr” guruhiga mansub isyonchilar samolyot qulayotgani, shuningdek, Rossiya harbiy samolyotlarining alohida belgilari aks etgan yonayotgan bo‘laklarning videolarini e’lon qildi.
Rossiya 2015-yil kuzidan beri Suriyada harbiy operatsiya olib bormoqda — mamlakatda 2011-yildan buyon fuqarolar urushi davom etmoqda. Operatsiyadan ko‘zlangan rasmiy maqsad — terrorchilarga qarshi kurashda Bashar Asad hukumatiga ko‘mak berish; ayni vaqtda Rossiya terrorchilar deb tan olinmagan isyonchilarning marralariga ham zarbalar bergan.
Rossiyaning Suriyadagi operatsiyasi davomida, rasmiy ma’lumotlarga ko‘ra, 40 dan ziyod rossiyalik harbiy xizmatchi halok bo‘lgan.
Izoh (0)