Суриялик исёнчилар 3 февраль куни Россиянинг Су-25 самолётини уриб туширди. Бу ҳақда, Syrian Observatory for Human Rights ташкилотига асосланиб, BBC News хабар бермоқда.
Meduza’нинг ёзишича, самолёт учувчиси катапульта қилишга улгурган. Conflict Intelligence Team тадқиқот гуруҳи исёнчиларнинг ахборот манбаларига асосланиб хабар беришича, учувчи ҳалок бўлган.
Россия Мудофаа вазирлиги Сурияда Россиянинг Су-25 самолёти уриб туширилгани ва ҳодиса оқибатида учувчи ҳалок бўлганини тасдиқлади. Бу ҳақда «Интерфакс» хабар бермоқда.
«Жайш ан-Наср» гуруҳига мансуб исёнчилар самолёт қулаётгани, шунингдек, Россия ҳарбий самолётларининг алоҳида белгилари акс этган ёнаётган бўлакларнинг видеоларини эълон қилди.
Россия 2015 йил кузидан бери Сурияда ҳарбий операция олиб бормоқда — мамлакатда 2011 йилдан буён фуқаролар уруши давом этмоқда. Операциядан кўзланган расмий мақсад — террорчиларга қарши курашда Башар Асад ҳукуматига кўмак бериш; айни вақтда Россия террорчилар деб тан олинмаган исёнчиларнинг марраларига ҳам зарбалар берган.
Россиянинг Суриядаги операцияси давомида, расмий маълумотларга кўра, 40 дан зиёд россиялик ҳарбий хизматчи ҳалок бўлган.
Изоҳ (0)