Termizda O‘zbekistonga tahsil olish uchun kelgan afg‘on yoshlari kutib olindi

Termiz xalqaro aeroportida Oliy va o‘rta ta’lim vazirligi huzuridagi Afg‘oniston fuqarolarini o‘qitish ta’lim markazining ilk qaldirg‘ochlari kutib olindi. Bu haqda O‘zA xabar bermoqda.

Termiz tumanida barpo etilgan ta’lim markazida qo‘shni davlat yoshlarining o‘zlari tanlagan kasb bo‘yicha o‘qib, yetuk mutaxassis bo‘lishi uchun barcha sharoit yaratilgan. Auditoriya va laboratoriyalar zamonaviy ta’lim standartlari asosida jihozlangan. Barcha qulayliklarga ega yotoqxona barpo etilgan.

Afg‘onistonlik talaba-yoshlar Hakim at-Termiziy majmuasini ziyorat qildi, Termiz arxeologiya muzeyida bo‘ldi. Shaharning boshqa diqqatga sazovar joylarini tomosha qildi.

— O‘tgan yili kollejni tugatdim. O‘zbek tili va adabiyoti bo‘yicha oliy ma’lumotli mutaxassis bo‘lib, kelgusida o‘z yurtimizda bolalarga shu tilni o‘rgatishni maqsad qilib olganman. Bu shahar bizda dastlabki kundanoq katta taassurot o‘yg‘otdi. Ayniqsa, tarixiy obidalar va boy qadimiy merosga ega muzeyni tomosha qilib, O‘zbekiston haqida ko‘plab qiziqarli ma’lumotlarga ega bo‘ldik, — deydi Afg‘onistonning Mozori Sharif shahridan kelgan Saidg‘ulom Saxiy.